Almatylyq ekologtar salaq turǵyndarmen kúresip álek. Olar qalanyń tómengi aýmaǵyndaǵy ózen ańǵarlaryna tóńirektegi adamdar qoqystaryn tastap ketýlerin doǵarmady dep nalıdy. Saldarynan qatqyl qaldyq álgi ózenderdi borsytyp jibergen. Al, qolańsa ıis mańaıǵa tegis jaıylypty. Qurt-qumyrsqa qujynaǵan aýmaqtardy ázirge kimniń tazalaıtyny belgisiz. Óıtkeni, kóp oryn qaraýsyz jatyr. Al, jaýapty páter ıeleri koperatıvi basshylary salyq tóleýden jaltaryp keledi. Tipti, quryǵy uzyn quzyrlylarǵa qyr kórsete bastaǵan.
Esentaı ózeniniń tómengi saǵasy borsyp jatyr bul kúni. Óıtkeni, kelip-ketkenniń barlyǵy qoldaǵy kereksiz zatyn shimirikpesten tastap ketetin kórinedi osy jerge. Saldarynan aıaq alyp júrý muńǵa aınalǵan. Al jaýaptylar quzyrlylardan jaltarýmen keledi. Tipti, olar ekolog kórse - iz sýytýǵa daıyn turady.
Qapyda kelgen quzyrlyǵa shúılige ketetin jaýapty bul. Ózine qarasty aýmaq qatqyl qaldyqqa qaqalyp tursa da, aıybyn moıyndaýdan bas tartady. Aıtýynsha, saı-salany qoqysqa úıgen tóńirektegi turǵyndar eken. Jyly sóılesýge yńǵaı tanytqan, biraq janyna jýytqan adam bolmapty.
Ashýǵa mingen koperatıv tóraǵasy azdan soń sabasyna túse bastady. Aıybyn túsinip, araǵa aýla sypyrýshylardy alyp keldi. Alaıda, tazalyq saqshylary bul soraqylyqqa kóz juma qaraı almady.
«Men salma demeımin! Men ózimniń kinámdy moıyndaımyn. Iá, myna jer taza emes. Biraq, adam sıaqty túsinýge bolady ǵoı. Ońaı emes ondaı aqshany tóleý», - dedi «Dorojnık» PIK tóraǵasy Álı Musabekov.
Ekologtardy kóndirýge qansha tyrysqanymen, qabaǵy qatýly saqshylar jibimedi. Sóıtip, ózen ańǵaryn aıǵyzdaǵan páter ıeleri koperatıvi basshysyna 30 aılyq eseptik kórsetkish kóleminde aıyppul saldy. Tap osyndaı sommany mańaıdaǵy kásiporyn ıesi de arqalady. Ol da tazalyqqa salǵyrt qaraǵan eken.
«Sáýir aıynyń basynan bastap, qorshaǵan ortany jáne ekologıany qorǵaý bólim mamandary aýdandy aralaý barysynda erejege sáıkes emes 252 meken-jaı anyqtaldy. Quqyq buzýshylyq erejesine aýdandyq ákimshilik tarapynan tazalaý jumystary júrgizildi», - dedi Tabıǵı resýrstar jáne tabıǵatty paıdalanýdy retteý basqarmasynyń bólim basshysy Qaırat Toqtasynov.
Tazalyq janashyrlary tekseris kezinde Túrksib aýdanyndaǵy myna aýmaqty da anyqtaǵan. Alyp ańǵar - otalǵan butalarǵa, tastalǵan qoqysqa toly. Tipti, búlingen jıhaz da jatyr munda. Aýdandyq ekologtar saıdy qaldyqqa bóktirgen jaqyn jerdegi turǵyndar deıdi. Olar qoqys salar jáshik bolmaǵan soń, kereksiz zattaryn osy jerge úıe bergen. Al, aýmaqqa eshkim jaýapty emes.
«Munda ornalasqan eki úı de eshqandaı PIK-ke qaramaıdy. Al, turǵyndar qoqystaryn anaý ańǵarǵa aparyp tastaıdy. Sondyqtan biz tústen keıin, osyndaǵy jurtpen túsindirme jumystaryn júrgizemiz», - dedi Túrksib aýdany ekologıa bóliminiń basshysy Muhammedjan Aıtjanov.
Jerdiń ıesi joqtyǵynan, ekologtar bul joly eshkimdi jaýapqa tarta almady. Alaıda, olar aýdandyq ákimdikpen birlesip, bul túıitkildi osy aptada sheshemiz dedi. Qobyrsyp jatqan qoqys qalaı da alynady.
