Kásipkerlerge qyzmet kórsetý ortalyǵynyń (KQKO) ashylýy Qazaqstan halqynyń birligi kúnimen tuspa-tus kelip, Almaty oblysy Kásipkerler palatasy Óńirlik keńesiniń tóraıymy Rımma Salyqova, oblystyq Kásipkerler palatasynyń dırektory Narıman Ábilshaıyqov, Qapshaǵaı qalasynyń ákimi Talǵat Qaınarbekov jáne bıznes qoǵamdastyq pen memlekettik organdar ókilderiniń qatysýymen ótti.

Narıman Ábilshaıyqovtyń sózinshe, Qapshaǵaı qalasyndaǵy KQKO Almaty oblysynda aýdandyq jáne qalalyq deńgeıde ashylǵan tuńǵysh ortalyq bolyp tabylady.

«Bul Ortalyqtyń ashylýy Qapshaǵaı kásipkerlerine tolyq qyzmet kórsetip qana qoımaı, Balqash jáne Kerbulaq aýdanynyń kásipkerlerine de tıisti qyzmet kórsetýge múmkindik beredi. Atalmysh Kásipkerlerge qyzmet kórsetý ortalyqtaryn Talǵar men Qarasaı aýdandarynda da ashýdy josparlap otyrmyz. Osylaısha, bizdiń qyzmet Almaty óńirindegi kásipkerler úshin odan ary qoljetimdi jáne qolaıly bolady», - dep atap ótti oblystyq Palata basshysy. 

Kásipkerlerge qyzmet kórsetý ortalyǵynda «bir tereze» prınsıpi boıynsha býhgalterlik, zańgerlik, marketıńtik qyzmetter, memlekettik satyp alý, kásipkerlikti qoldaýǵa arnalǵan memlekettik baǵdarlamalar boıynsha keńester beriledi.

Taǵy bir aıtýly jańalyq - Kásipkerlerge qyzmet kórsetý ortalyǵynda  memlekettik organdar ókilderi kásipkerlerdi sáýlet jáne qala qurylysy, jer qatynastary máseleleri boıynsha qabyldap, qyzmet kórsetedi. Sonymen birge Kásipkerlerge qyzmet kórsetý ortalyǵy ǵımaratynda «Bıznes mektep» komponenti boıynsha kásipkerlik negizderine oqytý men semınarlar júrgiziledi.

Ortalyq janynda qalalyq kásipkerler keńesiniń bólmesi jáne memlekettik organdardyń qabyldaý júrgizýine arnalǵan kásipkerlerdi qabyldaý bólmesi ashyldy.

Óńirlik keńes múshesi, Qapshaǵaı qalasy Kásipkerler keńesiniń tóraǵasy Artýr Hachatrán qala ákimdigin KQKO qurýdaǵy qoldaýy úshin alǵysyn bildirdi.

«Jergilikti bıliktiń bizdiń bastamalarymyzdy belsegji qoldap kele jatqany atap óterlik jaıt. Kásipkerlikti qoldaý arqyly qalanyń áleýmettik-ekonomıkalyq jaǵdaıyn joǵarylatyp, óńirimizdiń bolashaǵyna salym jasaımyz. Sondyqtan birlesken jumys pen ózara dıalog asa mańyzdy», - deıdi kásipker.

Óz kezeginde qala ákimi Talǵat Qaınarbekov kásipkerlikti qoldaý jumystyń asa mańyzdy mindeti ekenin atap ótti. Qazirgi tańda Qapshaǵaıda 3,6 myńnan astam shaǵyn jáne orta bıznes sýbektisinde 16,5 myńnan astam adam jumys isteıdi.

«Kásipkerlerge qyzmet kórsetý ortalyǵynyń qurylýy qalamyzda jumys istep turǵan kásipkerlerge jáne kásipkerlik yntasy bar azamatarǵa qolaıly jaǵdaı jasaýǵa baǵyttalǵan. Osy ortalyqta olar oqytý týraly aqparattan bastap óz jobasyn nemese isin qarjylandyrýǵa deıingi eń tolyq, qajetti jáne shynaıy málimetti ala alady. Sondyqtan Kásipkerlerge qyzmet kórsetý ortalyǵy Qapshaǵaıdaǵy kásipkerliktiń tıimdi damýyna yqpal etetine senimdimiz», - dedi Talǵat Qaınarbekov.

Aıta keteıik, bıyl Kásipkerler palatasynyń Qapshaǵaı qalalyq fılıaly kásipkerlerge 500-deı servıstik qyzmet pen keńester berdi. Ótken jyly 45 bıznes-jospar ázirlenip, onyń 16-y jalpy somasy 72 mln teńgege Nátıjeli jumyspen qamtý jáne jappaı kásipkerlikti damytý baǵdarlamasy aıasynda qarjylandyryldy.

Qalalyq fılıaldyń qoldaýymen 2017 jyly «Bıznestiń jol kartasy - 2020» baǵdarlamasy aıasynda 28 mln teńgege 2 joba qarjylandyryldy jáne 3 joba quny 4,5 mln teńge bolatyn memlekettik grantqa ıe boldy. «Bıznes-keńesshi» jobasy boıynsha 36 qapshaǵaılyq bıznes oqytýdan ótti. Al «İskerlik baılanystar» jobasy arqyly 3 kásipker shetelde óz biliktiligin arttyryp keldi.  

Eske salsaq, Almaty oblysyndaǵy tuńǵysh tolyqformatty Kásipkerlerge qyzmet kórsetý ortalyǵy jyl basynda Taldyqorǵanda iske qosylǵan bolatyn. Taldyqorǵandaǵy Kásipkerlerge qyzmet kórsetý ortalyǵynda servıstik qyzmetter jáne jaryq, sý, gaz jáne jylýǵa qosylý boıynsha tehnıkalyq sharttardy rásimdeý boıynsha qyzmetter kórsetiledi.