«Mańǵystaýmunaıgaz» AQ-na merdigerlik qyzmet kórsetetin Qalamqas kenornynda ornalasqan «QazPromLogıstık» JSHS-nyń 100-ge tarta munaıshysy jumystarynan bas tartty.

Mundaı jáıtqa mekeme basshylarynyń jumyskerlerge arnalǵan tıisti talaptardy oryndamaýy sebep bolyp otyr. Atap aıtqanda munaıshylardyń jatyn oryndary qolaısyz, jalaqylary tómen, eńbek demalysy berilmeıdi, eńbek sharty jasalynbaǵan, zeınetaqy men áleýmettik aqylar tólenbegen.  Al eń soraqysy naýqastanǵan adam eshbir arnaıy kómeksiz  dereý jumystan bosatylatyn kórinedi. Kenorynynda radıasıanyń áserinen densaýlyqtary syr bergen azamattardyń qarasy kóp. Sondaı-aq, jumyskerlerdiń arnaıy jumys kıimi de qarastyrylmaǵan. Qolaısyz aýa raıyna qaramastan tynymsyz eńbek etip jatqan munaıshylardy tasıtyn kóliktiń de bolmaýy úlken narazylyq týdyryp otyr.

«QazPromLogıstık» JSHS basshylyǵynyń ne sebepti óz jumyskerlerine nemquraıdy qarap, qara altyn óndirýshilerdiń eńbek ónimdiligin tómendetip otyrǵany túsiniksiz. Degenmen bul jáıt zańdy jelkesinen basýdyń aıqyn kórinisi ekeni jasyryn emes. Atalǵan mekemeniń  narazy bir top mamandary tipti ózderiniń basshylarynyń da esimin tolyq bilmeıtin kórinedi. Aıtýlarynsha kompanıa basshysynyń esimi – Ǵarıfolla. Biraq osy kúnge deıin jumyskerleriniń jaǵdaıyna esh alańdaı qoımaǵan. Ken orynynda kún, tún demeı ter tógetin munaıshylar oblys ákimi Eraly Toǵjanov pen oblys prokýrory Dastan Sartaevtan kómek qolyn sozyp, jaǵdaılaryn túzeýge yqpal etýin suraıdy.