Jeńis kúni qarsańynda Astana ákimi Uly Otan soǵysynyń ardagerlerin quttyqtady. Búginde bas qalada UOS-nyń 93 qatysýshysy turady, olardyń birde bireýi nazardan tys qalǵan emes, dep habarlaıdy elorda ákimdiginiń resmı saıty.

Asylhan Tabyldyuly Bekbaev armıa qataryna 18 jasynda shaqyrylǵan. 1944 jyldyń qarashasynda 134-shi gvardıalyq avıasıa polkiniń 6-shy gvardıalyq avıasıalyq bombylaý dıvızıasynyń 3-shi Belarýs maıdanynda basqynshylardan Belorýssıa men Prıbaltıkany azat etti. Soǵystyń barlyq surapyl taýqymetinen ótken ol, qalǵan ǵumyryn bilim salasyna arnaıdy.

«Armıada 10 jyl boldym, onyń 4 jyly Shyǵys Prýssıadaǵy soǵysta ótti. Bul soǵys týraly ne aıtýǵa bolady? Ózime qymbat joldastarymnyń bári esimde. Men Shyǵys Prýssıadan Pe-2 ushaǵymen ushyp, sol jerde aýyr jaraqat alǵandyqtan, júre almaı qaldym. Maǵan belarýstyq Tatána Novıkova degen qyz kútim jasady. Sodan biraz ýaqyt ótken soń men úıge ata-anama Tatánaǵa úılenýge ruqsat berińder dep hat jazdym. Ata-anamnan ruqsat bergeni týraly hat aldym, biraq ony Besqaraǵaı aýdanyna alyp kel dedi. Men onymen sóılesip kelistim de, Shyǵys Qazaqstan oblysyna alyp keldim. Ol osynda qazaq tili men ádet-ǵurpyn, salt-dástúrin úırenip aldy. Anam aýyryp júre almaı qalǵan kezde kútimdi Tatána jasady, ol sondaı ǵajap jan edi», – deıdi maıdanger óziniń soǵys týraly tarıhyn baıandap.

Áset Isekeshev ardagerge syılyq tabys etip, erligi úshin alǵys aıtty.

«Tóbemizdegi tunyq aspan úshin sizderge kóp rahmet. Sizder 4 jyl boıy qanshama qıyndyqtardan, ózderińizge qymbat adamdardy joǵaltý sátterin bastan ótkerdińizder. Jyl saıyn ardagerler azaıyp barady, biz aramyzdaǵy árbir batyrǵa alǵys aıtamyz, baǵalaımyz. Bizdiń mindet – sizderdi kózimizdiń qarashyǵyndaı saqtap, erteńgi urpaqqa erlikterińiz týraly aıtyp qaldyrý. Sizderge jáne jaqyndaryńyzǵa zor densaýlyq tileımin», – dedi ákim.

94 jasar Mıhaıl Petrovıch Kochetkov Batys quramynda úshinshi Belorýssıa jáne biringshi Prıbaltıka soǵysynda shaıqasty. Jeńis kúnin Shyǵys Prýssıadaǵy Kenıgsberg túbinde qarsy aldy. 

Ardager ákimge soǵystyń qıyndyqtary týraly aıtyp berdi, sońynan memlekettiń únemi qoldap kele jatqandyǵyna rızashylyǵyn bildirdi:

«Soǵystyń bitýin nemis jerinde qarsy aldyq. Bizge okoptan shyǵyńdar, nemister berildi, soǵys bitti dep aıtqany esimde qalypty. Ol kezde sengen de joqpyn, shnapstan keıin olardyń kózine berilgen nemister ǵana emes, teńiz de sıraqtarynan kelmeıtin shyǵar dep oıladym, – dep qaljyńdady ardager. Biraq keıin jaılap-jaılap okoptan shyǵa bastadyq, rasynda eshkim oq atpady. Bir-birimizdi qushaqtap quttyqtaı bastadyq. Jalpy, jastardy Otandy qorǵaýǵa, beıbitshiliktiń qadirin bilip, eldiń ıgiligine jumys jasaýǵa shaqyramyn. Qazir barlyǵy tez damýda, bir ornynda turyp qalmaıdy, jańa astanamyz bar. Sondyqtan tek qana alǵa umtylý qajet, ol úshin barlyq jaǵdaı jasalǵan».

Aıta keteıik, búginde Astanada UOS-nyń 93 ardageri turady. Jeńis kúni qarsańynda árbir qatysýshyǵa bir rettik 511 135 teńge kóleminde materıaldyq kómek beriledi. Budan basqa, jeńildikter men kepildik boıynsha Uly Otan soǵysynyń múgedekteri men qatysýshylaryna teńestirilgenderge 21 645 teńge (9 AEK) tólenedi. Soǵys jyldary UOS ardagerleriniń qaıtys bolǵan jesirleri, jeńildikter men kepildikter jaǵynan soǵysqa qatysýshylar men múgedekterine teńestirilgen adamdardyń basqa sanattaryna, áskerı jyldardaǵy tyl eńbekkerlerine – 10 823 teńgeden (4,5 AEK) beriledi.