Armenıa parlamenti opozısıa lıderi, "Elk" partıasynyń jetekshisi Nıkol Pashınándy el premer-mınıstri etip saılady dep jazady Azattyq radıosyna silteme berip Qamshy.kz aqparat agenttigi. Daýys berý 8 mamyr kúni ótti. Pashınán kandıdatýrasyn 59 depýtat qoldap, 42 depýtat qarsy daýys bergen.

Endi Pashınán eki apta ishinde úkimet músheleriniń tizimin jasap, prezıdentke usynýy tıis.

Mamyrdyń 1-i kúni Armenıa parlamenti depýtattary Nıkol Pashınánnyń premer-mınıstr bolýyna qarsy daýys bergen. Armenıa konstıtýsıasy saı, Pashınán premer-mınıstr bolyp saılaný úshin, ony 105 depýtattyń 53-i qoldaýy tıis edi. Biraq parlamenttegi eń kóp orynǵa ıe Respýblıka partıasy fraksıasynyń biraz depýtaty Pashınán kandıdatýrasyn qoldamaǵan.

Osydan keıin Pashınán halyqty qaıta kóshege shyǵýǵa úgittegen. Mamyrdyń 2-si kúni halyq joldy jaýyp, narazylyq kúsheıe túskende Respýblıkalyq partıa kelesi saılaýda usynylǵan kandıdatty qoldaıtyndaryn aıtqan. Premer-mınıstr saılaýy 8 mamyrǵa belgilengen. Pashınán jaqtastary birneshe kúnge narazylyqty toqtatqandaryn, eger talaptary oryndalmasa qaıta kóshege shyǵatyndaryn málimdegen.

Sáýirdiń ortasynan beri Armenıada turǵyndardyń bılikke qarsy jappaı narazylyq bastalǵan. Halyq qatarynan eki merzim el prezıdenti bolǵan Respýblıkalyq partıa lıderi Serj Sargsán premer-mınıstr bolyp saılanýyna qarsy shyqqan. Úkimetke qarsy halyqtyń jappaı narazylyǵynan keıin otstavkaǵa ketken edi.

Oǵan deıin sońǵy on jylǵa jýyq ýaqyt boıy Sargsán Armenıa prezıdenti bolyp otyrǵan kezde júrgizilgen konstıtýsıalyq reforma nátıjesinde premer-mınıstrdiń qyzmet ókileti keńeıtilgen bolatyn.