Qaraǵandy oblysynyń Qarqaraly aýdanynda búdjetten 53 mıllıon teńge jymqyrýǵa qatysy bar turǵyn úı-kommýnaldyq sharýashylyǵy bólim basshysy sottaldy, - dep habarlaıdy Tengrinews.kz tilshisi. 

"9 sáýirde "Qaraqaraly aýdany turǵyn úı ınspeksıasynyń TKSH, JKAJ bólimi" MM basshysy 2016 jyly "Nurly jer" baǵdarlamasy boıynsha bólingen búdjet qarjysynan 52 mıllıon teńge jymqyrǵany úshin alty jylǵa bas bostandyǵynan aıyryldy", - dep habarlady Qaraǵandy oblysy boıynsha Sybaılas jemqorlyqqa qarsy is-qımyl agenttigi basshysynyń orynbasary Erik Esenov.  Sot úkimi boıynsha, ol alty jylǵa bas bostandyǵynan jáne memlekettik qyzmette qyzmet etý quqyǵynan ómir boıyna aıyryldy. Sottalýshynyń múlki tárkilenbeıdi jáne jazasyn qaýipsizdigi ortasha qylmystyq-atqarý mekemesinde óteıdi.  Sot málimeti boıynsha, 39 jastaǵy burynǵy sheneýnik kinásin tolyq moıyndap, prokýrormen kelisimge kelgen. Ol osy laýazymda 2015 jyldan beri bolǵan. 

İs materıaly boıynsha, áıel adam bul iske óziniń azamattyq nekedegi kúıeýin tartqan. Jalǵan kásiporyn arqyly tender utyp alyp, jumysty asyryp kórsetilgen baǵamen jasaǵan. Aıta keteıik, áıeldiń azamattyq nekedegi kúıeýine qatysty is onyń ólimine baılanysty toqtatyldy. Bul iske qatysty ózge tulǵalarǵa qatysty qozǵalǵan is bólek qaralady.  Kesilgen jazany sottalýshy 5 jyldan keıin óteıdi, óıtkeni onyń emizýdegi balasy bar. Sonymen qatar, sottalýshydan 19 mıllıon teńge kóleminde materıaldyq shyǵyn óndirildi.