Azat Perýashev qazaqstandyq jemqorlardyń ofshorlyq aımaqtaǵy qarajatyn elge qaıtarý boıynsha Májilistiń jáne Eýropalyq Parlamenttiń birlesken jumys tobyn qurýdy usyndy.
«Aq jol» demokratıalyq partıasynyń kóshbasshysy Azat Perýashev qazaqstandyq jemqorlardyń ofshorlyq aımaqtaǵy qarajatyn elge qaıtarý boıynsha Májilistiń jáne Eýroparlamenttiń birlesken jumys tobyn qurýdy usyndy.
Bul usynysty 10-mamyrda Parlament Májilisinde ótken «Qazaqstan Respýblıkasy-Eýropalyq Odaq» parlamenttik yntymaqtastyq komıtetiniń XV otyrysy aıasynda Eýropalyq Parlament delegasıasymen kezdesý barysynda málimdedi.
Azat Perýashev 2015 jyldyń 25 qyrkúıeginde Komıtettiń XIII otyrysynda Eýroparlament delegasıasyna Eýropaǵa qashqan sybaılas jemqor sheneýnikterdiń qarajatyn izdestirý jáne Qazaqstanǵa qaıtarý jónindegi birlesken komısıa qurý týraly usynys jasaǵanyn da eske sala ketti.
«Sol kezde biz Eýroparlament depýtattarynan halyqtan urlanǵan aqshany anyqtaýǵa jáne ony qaıtarýǵa kómek kórsetýin suradyq. Biz quqyq qorǵaý organdarynyń qyzmetin qaıtalaýdy usynbaımyz. Qylmystyq qýdalaý - olardyń mindeti. Alaıda, urlanǵan aqshany qaıtarý jónindegi jumystyń nátıjesi óte az, mardymsyz ekenin kórip otyrmyz.
Sondyqtan da, Qazaqstanǵa jemqor sheneýnikter urlap ketken aqshany qaıtarý Eýroparlamentpen ózara yntymaqtastyqymyzdyń mańyzdy mindetine aınalmaq. Bul úshin zańnamalyq kedergiler bolsa - olarmen birlese otyryp jumys isteıik», - dep atap ótti depýtat.
Perýashev eýropalyq tájirıbede sybaılas jemqorlarmen zańsyz urlanǵan nemese salyq salýdan jasyrynǵan qarajatty elge qaıtarý mysaldary bar ekenin de tilge tıek etti.
«Búginde biz ınvestısıa, ekonomıkalyq jáne áleýmettik damý týraly, baılar men kedeıler arasyndaǵy alshaqtyqty qysqartý máseleleri týraly aıtyp jatyrmyz. Ulttyq Banktiń basshylyǵy bergen málimetterge sáıkes -100 mıllıard dollarǵa jýyq qarajat, al halyqaralyq sarapshylardyń baǵalaýy boıynsha - 140 mıllıard dollar kóleminde qarajat Qazaqstannan zańsyz shetelge shyǵarylǵan. Mine, munda ınvestısıa, ekonomıka jáne kedeılikpen kúresý degenniń túpki negizi osynda jatyr», - dedi Perýashev.
«Meniń oıymsha, Qazaqstan bul máselede Eýroparlamenttiń kómegine senim artýǵa quqyly. Eki jyldan astam ýaqyt ótti, biraq bizdiń bastamamyzǵa áli kúnge deıin jaýap joq. Sondyqtan men taǵy da jemqor sheneýnikter urlaǵan qarajatty elge qaıtarý týraly Qazaqstan parlamentiniń jáne Eýropalyq Odaqtyń birlesken jumys tobyn qurýdy usynamyn jáne búgingi otyrystyń hattamasyna osy usynysty qosýdy suraımyn », - dep óz sózin támamdady «Aq jol» kóshbasshysy.
