Búgin Túrkistan qalasyndaǵy «Áziret Sultan» memlekettik tarıhı-mádenı qoryq-mýzeıinde Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda Jambyl oblystyq tarıhı-ólketaný mýzeıiniń «Ortaǵasyrlyq Tarazdyń quıma keramıkasy» atty jyljymaly kórmesiniń saltanatty ashylýy ótti. 

Kórmeniń maqsaty - óńirler arasyndaǵy mádenı baılanystardy nyǵaıtý jáne murajaılar isin dáripteý, Jambyl oblystyq tarıhı-ólketaný mýzeıi qoryndaǵy qundy jádigerlerdi nasıhattaý. Atalǵan sharaǵa Túrkistan qalasy ákimdiginiń mádenıet jáne tilderdi damytý bóliminiń basshysy J.Ibragımov, «Áziret Sultan» qoryq-mýzeıi dırektorynyń orynbasary S.Úrkimbaev, Jambyl oblystyq tarıhı-ólketaný mýzeıiniń dırektory G.Emberdıeva, buqaralyq aqparat quraldary meǵ qala qonaqtary jáne mýzeı qyzmetkerleri qatysty. 

Kórme barysynda Túrkistan qalasy ákimdiginiń mádenıet jáne tilderdi damytý bóliminiń basshysy J.Ibragımov Jambyl oblysynan kelgen qonaqtarǵa ystyq yqylasyn bildirip, qala ákiminiń atynan alǵys hat tabystady. «Áziret Sultan» qoryq-mýzeıiniń dırektory orynbasary S.Úrkimbaev kórmeniń mańyzdylyǵyna toqtala kele, mýzeıler arasyndaǵy qarym-qatynastyń odan ári damýyna tilektestigin bildirip, qonaqtarǵa alǵys hat, kádesyılar men mýzeıdiń baspa ónimderin syıǵa tartty. Sonymen qatar, Jambyl oblystyq tarıhı-ólketaný mýzeıiniń dırektory G.Emberdıeva Jambyl oblysynyń tarıhı tulǵalary, rýhanı muraǵa toly ólke ekendigin aıta kele «Áziret Sultan» qoryq-mýzeıiniń ujymyna óz alǵysyn jetkizdi. 

Kórmege Taraz qalasynyń jáne aýdandaryndaǵy arheologıalyq qazba jumystary nátıjesinde tabylǵan 70-ge jýyq jádigerler qoıyldy. Olardyń ishinde ortaǵasyrlyq turmysta túrli maqsatta qoldanylǵan kúıdirilgen, kúıdirilmegen, jalatpaly qysh ydystar, úlkendi-kishili shyraǵdandar, hosh ıisti átirler men dárilik zattar, synaptardy saqtaıtyn jumyr tastar men maıshamdar, túrli oıý-órnek túsirilgen tárelkeler, jınaq sandyqshasy, syıymdylyǵy ár túrli astyq, suıyqtyq saqtaıtyn hýmdar, saptyaıaqtar jáne qoladan jasalǵan buıymdar qyzyqty jáne qaıtalanbas Taraz bıshisiniń jáne Býdda qudaıynyń músinderi, ortaǵasyrdyń sáýlet eskertkishiniń injý marjany bolǵan Aısha-Bıbı kesenesiniń kirpishteri halyq nazaryna usynylady. 

Aıta keterligi, atalǵan kórme Túrkistan qalasynda bir aıǵa jalǵasady.