Astana ákimi Áset Isekeshov jaıaý júrginshiler jolaǵyn kúndiz boıaýǵa qarsy bolǵan Facebook qoldanýshysynyń narazylyǵyna jaýap berdi, dep habarlaıdy Qamshy.kz aqparat agenttigi. 

Jelidegi «Astana – Kim? Qaıda? Qashan?» tobynyń múshesi jaıaý júrginshiler jolaǵyn kúndizgi ýaqytta boıap, jolda keptelis týdyrǵan jumysshylarǵa shaǵymdanǵan.

«Qurmetti Astana qalasynyń ákimshiligi, jolaqtardy Almatydaǵydaı túnde boıaýǵa bolmaı ma? Mindetti túrde onsyz da keptelisten abyr-sabyr bolyp jatatyn kúndizgi ýaqytta jasaý kerek pe?», - dep jazdy ol.

Shahar basshysy jaýapty keshiktirmeı, bolǵan jaıdy túsindirip berdi.

«Joldaǵy jolaqtardy boıaý aýa raıynyń qolaısyzdyǵynan keshiktirilip jatyr. Boıaý jumystaryn júrgizý úshin aýa temperatýrasy +15 gradýs bolýy tıis. Aldaǵy kúnderi aýa raıy túzelgende kúndiz de, túnde de jumys jasaıtyn bolamyz. Qolaısyzdyq úshin keshirim suraımyz. Sonymen qatar joldy jóndeý jumystary bastalady»,- dep jaýap berdi qala ákimi.

Jeli qoldanýshylary ákimge jedel jaýaby men jeke suraqqa nazar aýdarǵany úshin alǵys aıtty.