Aǵamnyń jaldamaly páterine jıi baryp turamyn. Jeńgeı ekeýi jumysta. Úsh balasyna bas-kóz kerek. Olar turyp jatqan aýdan - qalanyń eski aýmaǵy. Kópqabatty úı - Keńes zamanynan qalǵan basqalqa. Sol «hrýshevkaǵa» qarama-qarsy jurt «malosemeıka» ataıtyn jataqhana tıptes ǵımarat tur. Sonda barǵan saıyn bir kórinis aldymnan shyǵady: qarsy bettegi úıdiń úshinshi qabatyndaǵy tereze aldynda 4-5 jasar qyz balanyń qalqaıyp otyrǵany. Qashan kórsem solaı. Keıde qyz áınekten syrtqa úńilip turady; keıde qýyrshaǵymen oınaıdy; keıde sýret salady; keıde sol terezeniń podokonnıginde búk túsip jatady. Ústine qyzyl kórpeshe jamylǵanyn baıqaımyn. Búldirshinniń turaǵy - tereze aldyndaǵy tabansha taqtaıdyń erneýi. Al aǵash jıekti tereze – kóneniń kózi.
Kúreń perde túsirýli – kishkentaı qyz óz áleminde. Syrttaǵy adamǵa perdeniń bergi jaǵyndaǵy qyzdyń qupıa mekeni - qýyrshaqtar teatrynyń sahnasy ispetti. Biraq, qyz taǵdyry – qýyrshaq emes. Ol ózine sondaı shaǵyn álem jasap alǵandaı... ony sonshalyq shaǵyn álemge engizip jibergendeı. Qońyr qonjyǵyn qonjıtyp qoıyp, áńgimeleskenin balkonǵa shyǵyp tyńdaımyn. Ashyq jeldetkishten jińishke úni estiledi:
- Balpaǵym, men óskenshe, ekeýimiz terezeniń aldynda uıyqtaımyz. Áıtpese, bárimiz tósekke syımaımyz ǵoı. Sosyn ákem, úlken úı satyp alady, sosyn meniń úlkóóón bólmem bolady. Sosyn seni óz tósegime alyp jatam.
Kenet jabyq turǵan perde ysyrylyp, ar jaǵynan bala kótergen áıel shyqty.
- Qyzǵaldaq, júre ǵoı, sháıińdi ish.
Balkon tórtinshi qabatta bolǵandyqtan, bári alaqandaǵydaı kórinedi. Úı-jaılary ýysyma syıǵandaı-aq eken. Bir bólmede: kereýet, shkaf, ústel. Ústel basynda taǵy eki adam otyr... Terezeniń tusynan qońyr jel kúrsindi. Páterden pıaz salyp qýyrǵan kartop pen jórgektiń ıisi ańqydy.
Al kórshi áınektiń aldy qaptaǵan gúl. Olardy orys kempir sýǵaryp, baptap júr. Keıbiriniń túbin qopsytyp, tamyr jaıǵandaryn úlkenirek gúlsaýytqa otyrǵyzyp álek.
Terezeniń aldynda jaıqalǵan gúldermen qatar kún kózine talasa talpynyp qyzǵaldaq qyz jelkildep ósip keledi.
San tereze – san taǵdyr.
Aıbek Oralhan
