Máskeýde terezeden qulap, qaıtys bolǵan Tomırıs Baısafanyń ata-anasy tergeý jumystarynyń barysyn aıtyp berdi.

Marqumnyń ata-anasy – Darhan Qojabergenov pen Janna Ahmetova reseılik mamandardan ádiletti ári obektıvti tergeýdi talap etip otyr. Reseılik tergeý mamandarynyń boljamynsha, qyz óz-ózin óltirgen. Alaıda ata-anasy bul derekke senýden bas tartty.

«Bul istiń jumbaǵy kóp. Tergeý organdary jasaýy tıis keı áreketter jasalmaı jatyr. Máselen, Mýrtýzalı Medjıdovanyń aınalasy ǵana tergelip jatyr. Aýdıtorıa ishinde qyzym ekeýi ǵana bolǵan. Jigit bólmeniń esigin ústelmen tirep qoıady. Nege bulaı istegeni belgisiz. Aqyl esi durys eki azamat aýdıtorıaǵa kiredi. Qazir bireýi joq, al ekinshisi tipti kúdikti retinde tanylyp otyrǵan joq. Ol qazir tek kýáger eken», - dedi ashyndy Tomırıstiń anasy Janna Ahmetova.

13 sáýirde bolǵan oqıǵaǵa sáıkes, kýágerler qyzdy bireýdiń terezeden qulatyp jibergenine senimdi.

«Ol bostandyqta júr. Jarty kún ustapty da, jibere salypty. BAQ ókilderi alǵashynda qyzymdy bireýdiń ıterip jibergenin jarysa jazǵan. Bizge myna tergeý jumystary bóget keltirip otyr. Olarǵa Medjıdov "qyz ózi qulady" dep sendirgen. Tergeý organdary soǵan senip otyrǵan kórinedi. Al qyzymnyń dostarynan eshkim eshteńe suramaǵan», - dedi Janna Ahmetova.

Anasynyń aıtýynsha, Tomırıs Baısafa terezeden arqasymen qulaǵan. Iaǵnı ózin-ózi óltirýge bekingen adamnyń áreketine uqsamaıdy. Saýsaǵyndaǵy tyrnaqtary synǵan. Anasy muny "Tomırıstiń birnárseden ustanyp qalǵysy kelgeninen" dep boljaıdy. Al Tomırıs tiri bolǵanda, eshqandaı tergeý jumystary júrgizilmegen kórinedi.

Tomırıs Baısafanyń ákesi jigittiń bedeldi otbasynan shyqqanyna senimdi. Bul týraly ákesine Máskeý tergeý bóliminiń qyzmetkerleri aıtyp qalǵan.

Qyzymen bir kúnde birneshe ýaqyt sóılesip turatyn anasy qaıǵyly oqıǵa bolǵan kúni saǵat 12.42-de Tomırısqa habarlama jibergen. Al derekterge sáıkes, 12.47-de qyz terezeden qulap ketip, 20 kúnge jýyq reanımasıa bóliminde jatady. Janna Ahmetova tipti qyzynyń jaqyn dosy bolǵan Medjıdovpen de sóılesken.

«Ol sol kúngi kartınanyń kóz aldynda ekenin qaıtalap aıta berdi. Tomırıs onyń kóz aldynda qulaǵan eken. Qyzym jan daýysymen aıqaılaǵan. Joq, biz jigitke kiná artpaımyz. Tek túpkilikti tergeýdi talap etemiz», - dedi Janna Ahmetova.

Esterińizge sala keteıik, 21 jastaǵy Tomırıs Baısafa 2018 jyldyń 13 sáýirinde Máskeýdegi oqý ordasynyń terezesinen qulap ketedi. Kýágerler ony ózge bireýdiń ıterip jibergenine senimdi. Ázirge bar kúdik Tomırıstiń jaqyn aralasqan daǵystandyq dosyna túsip tur. Kýágerlerdiń aıtýynsha, qaıǵyly oqıǵa aldynda qyz ben jigit sózge kelip qalǵan.

Al 3 mamyrda qazaqstandyq stýdent aýrýhanada kóz jumdy.