Otyrarlyq jas aqynnyń  "Tumandy jarǵan Aı" kitabynyń tusaýkeseri men shyǵarmashylyq keshi ótti.

Elbasy  Nursultan Ábishuly Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda kóterilgen mindetterdi júzege asyrý Otyrar aýdanyndaǵy jas sýretshi, qolóner sheberi, aqyn qazaqtyń  qaısar qyzy atanyp ketken  Tursynaı Qaıratqyzynyń «Tumandy jarǵan Aı» kitabynyń tusaýkeseri men «Men baqytty ekenmin» atty shyǵarmashylyq keshi ótti. 

Saǵynysh pen muńnan, tazalyq pen sulýlyqtan  turatyn Tursynaıdyń óleńderi kóńil tolqynyn terbep, adam balasynyń jandúnıesin birde muńǵa, birde shyńǵa súırep beımaza kúıge bóleıtini shyndyq. Ózi jastaıynan arbaǵa tańylsa da aqyn qyzdyń  paıym-parasaty joǵary, talǵamy bıik, arman-maqsaty sheksiz. Eń bastysy -  ómirge qushtar jan. 

Kesh shymyldyǵy da avtordyń «Men baqytty ekenmin» óleńimen ashyldy.

Jyr súıer kópshilikti lırıkalyq  óleńderimen  sýsyndatqan keshte aýdan ákimi Aıtahanov Erlan Qýanyshuly jas ta bolsa tereń oı qozǵaı bilgen qundy da jańa kitapqa qutty bolsyn aıtyp, jańalyqqa, jasampazdyqqa qushtar Tursynaıdyń shyǵarmashylyǵyna tolaǵaı tabys tilep, aqyn qyzǵa arnaıy syı-sıapat tabystady. Al, Otyrar aýdanynyń Qurmetti azamaty, aqyn  Begaman Sultaev óz lebizin jyr shýmaqtarymen jetkizip, shyǵarmashylyǵyna sáttilik tiledi.

Kitaptyń tusaýy resmı túrde kesilgen soń  Otyrar ádebıet jáne óner birlestiginiń músheleri, aqyn-sýretshi, rýhanı ustazy Ádilhan Málik, aqyn-ustazdar  Altynaı Qasymbek pen Amankúl Omar, Gaýhar Júsipálıevalar júrek jardy tilekterin bildirip, aqyn qyzǵa shyǵarmashylyq tabys tiledi.

Shara barysynda kópshilikke Tursynaı Qaıratqyzynyń sıasy keppegen jyrlary tartý etilip, aqyn qyzdyń ónerdegi dostary áýelete án salyp, jaqut jyrdan shashý shashty.