Nursultan Nazarbaev Kýba Respýblıkasy Memlekettik keńesiniń jáne Mınıstrler keńesiniń tóraǵasy Mıgel Marıo Dıas-Kanel Bermýdeske kóńil aıtý jedelhatyn joldady, dep jazady Qamshy.kz aqparat agenttigi Aqordanyń baspasóz qyzmetine silteme jasady.
Memleket basshysy Gavana qalasynyń mańynda jolaýshylar ushaǵynyń apatqa ushyraýy saldarynan kóptegen adamnyń qaza bolǵany týraly habardy zor kúızelispen qabyldady.
«Osynaý qıyn sátte, qaza bolǵandardyń týystary men jaqyndarynyń, sondaı-aq barlyq Kýba halqynyń qaıǵysyna ortaqtasyp, Qazaqstan halqynyń jáne jeke ózimniń atymnan kóńil aıtamyn.
Zardap shekkenderdiń báriniń tezirek saýyǵyp, otbasylaryna oralýyna tilektestik bildiremin», – delingen Elbasy joldaǵan jedelhatta.
Aıta keteıik, 18 mamyrda Gavana áýejaıynan eldiń shyǵysyndaǵy Olgın qalasyna ushyp shyqqan Kýba memlekettik áýe kompanıasynyń Boeing 737 ushaǵy áýege kóterile salysymen kóp uzamaı jerge qulaǵan. Keı derekterge súıensek, jolaýshylar ushaǵynda bolǵan júzden astam adamnyń úsheýi tiri qalǵan.
