Almaty oblysynyń sharýalary bıyldan bastap kórshiles Qytaı Halyq Respýblıkasy men Iranǵa et eksporttaı bastaıdy dep habarlaıdy.

Alakól aýdanyndaǵy mal sharýashylyqtarynyń biri etti baǵyttaǵy Aberdın Angýs pen Gereford tuqymdy sıyrlardy ósirýmen aınalysady. Ondaǵy iri qara sany 15 myń basqa jetti. Aldaǵy ýaqytta mal bordaqylaý alańy men et kombınaty salynady. Mundaı óndiristik sıkl óz kezeginde shetelderge turaqty túrde et eksporttaýǵa múmkindik beredi. Jońǵar Alataýynyń baýraıynda ornalasqan bul sharýashylyqqa bes jyl buryn Avstralıadan 5 myń bas zeńgi baba tóli ákelingen edi. Aberdın-Angýs pen Gereford tuqymdy sıyrlardyń sany búginde 15 myńǵa jetken. Buzaýlary ystyq pen sýyqqa shydamdy keledi. «Biz maldy qamamaımyz, ashyq alańda turady. 50 myń gektar jaıylymdyq jerge kún kózinen qýat alatyn qorshaýlar ornatylǵan. Elektrlengen qorshaý malshynyń jumysyn atqarady ári sıyrlardy túrli aýrýlardan qorǵaıdy», – deıdi kásiporyn basshylary.