Bıyl BQO-da «Bıznes Bastaý» baǵdarlamasy boıynsha 2071 adamdy oqytý josparlanǵan. Bul kórsetkish byltyr 938 adamdy quraǵan bolatyn. Bul týraly birqatar máselelerdi kótergen BQO kásipkerler palatasy dırektorynyń mindetin atqarýshy Sáken Karın, óńirdegi kásipkerlik sektoryn, sondaı-aq shaǵyn jáne orta bıznesti damytý týraly usynystarymen bólisti.
Sáken Ábýhanuly aıtyp ótkendeı, sońǵy jyldary shaǵyn jáne orta kásiporyndardyń oblystyń ekonomıkasyna qosqan úlesi aıtarlyqtaı ósken. 2016 jyly óńirdegi shaǵyn jáne orta bıznes qurylymyndaǵy jalpy óńirlik ónim úlesi 42% quraǵan eken. Sońǵy eki jylda saýda aınalymy dınamıkasy eksporttyń 31%-ǵa óskenin, ımporttyń 5,6%-ǵa tómendegenin kórsetedi.
Aǵymdaǵy jyldyń 1 toqsanynda kásipkerlikti qorǵaý salasynda 71 jazbasha ótinish qaralyp, onyń 30-y (42%) oń sheshimin tapqan. Qorǵalǵan menshik quqyǵy 107 mln. teńgeni qurap otyr. Ótken jyly jazbasha ótinishterdiń azaıǵany baıqalady. Oblysta memlekettik-jeke menshik áriptestikti damytý baǵytynda da josparly jumystar qolǵa alynǵan. Búginde bul sala boıynsha jalpy somasy 19 125 495 myń teńgeni quraıtyn 14 joba júzege asyrylýda. Onyń 7-ýi bilim berý, 3-ýi densaýlyq saqtaý salasyna baǵyttalsa, qalǵany turǵyn úı-kommýnaldyq sharýashylyq, ekonomıka, joldar, qoǵamdyq tártip jáne qaýipsizdik salasyna tıesili.
– Oblys boıynsha bıznes bastaýǵa jalpy somasy 441,3 mln. teńgege 188 jobaǵa qarjylaı qoldaý kórsetildi. 14 sáýirindegi jaǵdaı boıynsha óńirde barlyǵy 216 ÁKK jumys isteıdi, onyń 8-i sút óndirý baǵyty boıynsha, 168-i seleksıalyq baǵytta, 31-i bordaqylaý,9-y ósimdik sharýashylyǵy boıynsha jumys jasaıdy. Kúni búgin ÁKK-lerge mal bordaqylaýǵa 2748,0 mln. teńge, analyq iri qara mal satyp alýǵa 988,3 mln. teńge nesıe berildi. 2018 jyly sút jınaý pýnktin ashý, mal bordaqylaý, asyl tuqymdy mal basyn ósirý, mal soıý alańdaryn salý, aýyl sharýashylyǵy janýarlaryn ósirý, jem-shóp tasymaldaryn uıymdastyrýǵa kólik quraldaryn satyp alý, et óńdeý zaýytyn salýǵa baǵyttalǵan 11 aýyl sharýashylyǵy kooperatıvterin qurý kózdelýde. Bul baǵyttaǵy jumystarǵa respýblıkalyq búdjetten 4014,0 mln. teńge bólindi, – dedi Sáken Karın.
Gúlim AQAP,
Batys Qazaqstan oblysy
