«Ákimder turǵyn úı-kommýnaldyq ınfraqurylymyn jetildirý máselesin memleket-jekemenshik seriktestigi negizinde belsendi sheshýi kerek. Ǵımarattardyń sapasyna, ekologıalyq tazalyǵyna jáne energıalyq tıimdiligine joǵary talap qoıý qajet».

         QR Prezıdenti N. Nazarbaevtyń «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty Joldaýynan

Aq Jaıyqta  qurylys jumystary qarqyndy júrýde. Osy oraıda Batys Qazaqstan oblys ákimi Altaı Kólginov Oral qalasyndaǵy birqatar qurylys nysandarynyń jumys barysymen tanysty.

Oblys basshysy aldymen kúrdeli jóndeýden ótip jatyrǵan Aqtóbe kóshesiniń Rýjeınıkov jáne Kýznechnaıa kósheleri aralyǵyndaǵy  jol ýchaskesinde boldy. Mundaǵy kúrdeli jóndeý jumystary «Túrkistan Jol Servıs» JSHS-nyń merdigerligimen júzege  asýda.

– Aqtóbe kóshesine kúrdeli jóndeý jumystaryn júrgizý jeti aı merzimge qarastyrylǵan bolatyn. Biz  jumysymyzdy 12 sáýirde bastadyq. Joldyń jalpy uzyndyǵy  740 metr. 900 metr jaıaý júrginshi joly salyndy.  Qurylys jýyrda paıdalanýǵa beriledi. Qazirgi tańda jol belgileri  men  tańbalaryn  ornalastyrý jumysy ǵana qaldy. Jergilikti turǵyndardyń ótinishi boıynsha joldy ýaqytsha ashyp qoıdyq, – deıdi «Túrkistan  Jol Servıs» JSHS-nyń bas ınjeneri Nurlybaı Jandáýlet.

Atalmysh kósheniń turǵyndary da kúrdeli  jóndeý jumystaryna dán rıza.

– Bul aýdanǵa 1960 jyldyń tórtinshi sáýirinde kóship keldim. Sodan beri bul jol mundaı kúrdeli jóndeýdi kórgen joq. Kóktem mezgilderinde jaıaý júrginshi joly  sý, balshyq bolyp júrýge kelmeıtin. Úıim joldyń jıeginde  ornalasqandyqtan, joldaǵy  erigen qardyń sýy úıdiń kireberis esigine deıin keletin. Qalanyń ortalyǵyna  barý úshin eki aıaq kıim tasıtyn edik. Qazir qýanyshymyzda shek joq. Kúrdeli jóndeýmen aınalysyp jatyrǵan balalar tań ala keýimde kelip, qarańǵy túskenshe jumystandy. Eńbekqor jandar eken. Nátıjesine qýanyp otyrmyz, – deıdi Aqtóbe kóshesiniń turǵyny Marıa Ivanchenko.

          Oblys ákimi júktelgen mindetti sapaly ári merziminen buryn oryndaǵan «Túrkistan Jol Servıs» ujymyna alǵysyn bildirdi. Munan keıin Altaı Seıdiruly qaıta salynyp jatyrǵan Depo kópirindegi jumys barysymen tanysty.

Qurylys jumystary «KA – Stroı LTD» JSHS-nyń merdigerligimen júzege asyp jatqan atalmysh kópir bıyl kúzge deıin  paıdalanýǵa berilmek.

– Qazir kópirdiń monolıtti bóligi boıynsha jumystardyń 95 paıyzy oryndaldy. Búgingi tańda ústeme plıta tóselýde. Mamyr aıynyń aıaǵyna deıin monolıtti bóligin aıaqtaýdy josparlap otyrmyz. Kópirge ústeme plıta  salǵan  soń gıdrolızasıalyq materıalmen  jabamyz. Sodan soń asfált tóseledi. Jumystar  qarqyndy júrýde. Jobaǵa sáıkes kópirdiń eni tórt baǵyttaǵy aýtokólik qozǵalysyna laıyqtalyp, segiz metrden 19,5 metrge deıin keńeıedi. Eki jaǵyna jaıaý júrginshi joly tartylady, – dedi ýchaske bastyǵy Baqyt Bekturǵanov.  

Osy oraıda aıta ketsek, shahardaǵy M. Mámetova atyndaǵy kóshe boıymen osy Depo kópirine deıingi aralyqtaǵy jol kúrdeli jóndelýde. «Nursat» JSHS-nyń merdigerligimen júzege asyp jatyrǵan qurylys jumystarynyń basym bóligi atqarylǵan. Ýchaske bastyǵy Baqtıar Qarabasovtyń aıtýynsha, jóndeý jumystary bir aı kóleminde aıaqtalmaq.

Oblys ákimi merdiger mekeme ókilderine jumys barysynda múmkindiginshe jergilikti qurylys materıaldaryn paıdalanyp, qurylys nysandaryn merziminde ári sapaly tapsyrý qajettigin jetkizdi. Ol sodan soń Ábýbákir Kerderi men Mánshúk Mámetova atyndaǵy kóshelerdegi jylý júıelerin qaıta qurý jumystarymen tanysty. Qurylys jumystary «Ýralskvodstroı» JSHS-nyń merdigerligimen júzege asýda. Sala mamandarynyń aıtýynsha, bul kóshede ornalasqan jylý qubyrlary 1987 jyly salynǵandyqtan, jaramsyz  bolǵan. Qazir qurylys jumysynyń 45 paıyzy oryndalyp otyr.  Ystyq sý shahar ortalyǵyndaǵy  kópqabatty úılerge shilde aıynda berilmek.

– Bıyl Oral qalasyndaǵy 50 kóshege jóndeý jumystary júrgizilmek. Qazirgi ýaqytta 26 kóshede jol qurylys jumystary bastaldy. Jalpy qala boıynsha 50 km jol jóndeledi dep kútilýde. Berilgen qarajat tolyq ıgerilýde. Ózderińiz kýá bolǵandaı, Aqtóbe kóshesindegi jol 60 jyldan beri jóndeý kórmegen.  Alty-jeti aıǵa josparlanǵan qurylys merdiger kompanıa qyzmetkerleriniń belsendiliginiń arqasynda bir aıdyń ishinde aıaqtalyp otyr. Jóndeý jumystary ótken joldardy bolashaqta da qadaǵalaıtyn bolamyz. Jol qurylysynyń sapasy tekserilýde.  Sondaı-aq búgin strategıalyq mańyzy bar Depo kópiriniń qurylys jumysymen tanystyq. Qurylys jumystary byltyr naýryz aıynda bastalǵan kópir kúzge taman oraldyqtardyń ıgiligine berilmek. Merdigerlermen birlesip jumys jasaýdamyz. Jibergen qatelikterin túzetýdemiz. Sondaı-aq qalanyń Ábýbákir Kerderi kóshesindegi  jylý qubyrlary  aýystyrylýda.  Bul TM-2, TM-7 magıstraldary bolatyn. Eki baǵyttaǵy jylý qubyrlaryn aýystyrýǵa respýblıkalyq búdjetten qarjy bólinip, ıgerilýde. Merdiger «Ýralskvodstroı» JSHS-nyń osy salada birneshe jyldyq tájirıbesi bar. Jylý qubyrlarynyń  eki shaqyrymdaı bóligi aýystyrylǵan.   Jaz aılarynda qurylys jumystaryn aıaqtaý josparlanyp otyr. Sonda  Oral qalasy boıynsha tas joldardaǵy  jylý magıstraldaryn jóndeý aıaqtalyp, kezeń-kezeńimen júzege asatyn kvartalishilik jylytý turbalaryn aýystyrý jumystary  qalmaq. Jumystyń aýqymdy bóligi jazda jalǵaspaq, – deıdi Oral qalasynyń  ákimi Murat Muqaev.