Ońtústik Qazaqstan oblysy ákimdiginde óńir basshysy Janseıit Túımebaev «Qazatomónerkásip» UAK» AQ Basqarma tóraǵasy Ǵalymjan Pirmatovpen kezdesti.  Basqosýda aımaqty áleýmettik-ekonomıkalyq damytý salasyndaǵy yntymaqtastyq máseleleri talqylandy, dep jazady Qamshy.kz aqparat agenttigi OQO ákimdiginiń baspasóz qyzmetine silteme jasap.

Kezdesý barysynda taraptar kompanıanyń áleýmettik nysandaryn Ońtústik Qazaqstan oblysynyń komýnaldyq menshigine berý máselelerin talqylady.

Oblys basshysy Janseıit Qanseıituly kásiporyndar sol óńirdiń  áleýmettik-ekonomıkalyq ahýalyna udaıy qoldaý kórsetýi kerektigin aıtty.

«Qazatomónerkásip shaǵyn jáne orta bıznestiń 80-nen astam ókilin tapsyryspen qamtamasyz etý arqyly otandyq taýar óndirýshilerge belsendi qoldaý kórsetip keledi. 2017-2018 jyldary kompanıa oblys kásipkerlerimen 101,6 mlrd. teńgege túrli kelisimshart jasady. Osy ekijaqty yntymaqtastyq aldaǵy ýaqytta da jalǵasyn tabady dep oılaımyn. Sondaı-aq, kásiporyndar ózderi ornalasqan Sozaq aýdanyndaǵy áleýmettik nysandardyń boı kóterýine atsalysyp turýy qajet», - dedi oblys ákimi.

«Qazatomónerkásip» UAK» AQ Basqarma tóraǵasy Ǵalymjan Pirmatov ulttyq atom kompanıasy aımaqty damytý, turǵyndardyń ómir sapasy men ál-aýqatyn arttyrý boıynsha óz mindettemelerin tolyq oryndap otyrǵanyn jetkizdi.

Aıta keterligi, Kompanıanyń 2017 jyldaǵy salyq tólemderiniń jalpy somasy 73 mlrd. teńgeden asqan bolsa, sonyń 8,2 mlrd. teńgesi Ońtústik Qazaqstan oblysynyń búdjetine aýdarylǵan. Budan bólek, jer qoınaýyn paıdalaný jónindegi kelisimniń sharttaryna sáıkes, byltyr aımaqtyń áleýmettik-ekonomıkalyq damýy úshin oblys búdjetine 873 mln. teńgeden astam qarjy bólindi.