Ońtústik Qazaqstan oblysynda 500-ge jýyq salyq tóleýshi men syrtqy ekonomıkalyq qyzmetke qatysýshylarymen Salyq, Keden kodeksterindegi jańashyldyqtardy túsindirý jáne sybaılas jemqorlyqqa qarsy is-qımyl máseleleri boıynsha keńeıtilgen forým ótti, dep habarlaıdy Qamshy.kz aqparat agenttigi OQO ákimdiginiń baspasóz qyzmetine silteme jasap.
OQO boıynsha Memlekettik kirister departamentiniń bastamasymen, QR Memlekettik qyzmet isteri jáne sybaılas jemqorlyqqa qarsy is-qımyl Agenttiginiń OQO boıynsha departamentimen birlese, OQO ákimdigi, «Nur Otan» partıasy OQOF jáne «Atameken» kásipkerler palatasynyń OQO fılıalynyń qoldaýymen uıymdastyrylǵan sharada salyq, keden kodeksteri túsindirilip, sybaılas jemqorlyqqa qarsy is-qımyl máseleleri talqylandy.
Oblystyq memlekettik kirister departamentiniń basshysy A.Úmbetálıevtiń tóralyǵymen ótkizilgen Forýmǵa, oblys ákiminiń orynbasary E.Sadyr, «Nur Otan» partıasy OQOF tóraǵasynyń birinshi orynbasary N.Joldasov, QR Memlekettik qyzmet isteri jáne sybaılas jemqorlyqqa qarsy is-qımyl Agenttiginiń OQO boıynsha departamentiniń basshysy Á.Kómekbaev, oblystyq kásipkerler palatasy dırektorynyń orynbasary Q.Akenov jáne oblystyq memlekettik kirister departamentiniń, Memlekettik qyzmet isteri jáne sybaılas jemqorlyqqa qarsy is-qımyl Agenttiginiń OQO boıynsha departamentiniń mamandary, oblystyń 500-ge jýyq kásipkerleri men sheteldik kompanıa ókildikteri qatysty.
İs-sharanyń maqsaty – shaǵyn jáne orta bızneske qoldaý kórsete otyryp, salyq, keden kodeksterindegi jańashyldyqtardy bıznes ókilderine jetkizý jáne bıznes ortada sybaılas jemqorlyqqa qarsy minez-qulyq úlgisin qalyptastyrý, kásipkerlerdiń sybaılas jemqorlyqqa yqpal etetin sebepter men jaǵdaılardy joıýǵa belsendi qatysýyn qamtamasyz etý.
Jıynda Departamenttiń basqarma mamandary jańa kodeksterge tolyqqandy túsindirme bere otyryp, kelesi negizgi ózgeristerge nazar aýdardy: Atap aıtqanda, «Arnaýly salyq rejımderi» qosymsha 678, 690 baptarmen tolyqtyryldy: ol, shaǵyn sýbektileri úshin tirkelgen shegerim paıdalanatyn arnaýly salyq rejımi. Bul rejımdi jumyskerlerdiń ortasha tizimdik sany
50 adamnan aspaıtyn jáne salyqtyq kezeńdegi kirisi eń tómengi jalaqynyń 12 260 eselengen mólsherinen aspaıtyn dara kásipkerler men zańdy tulǵalar qoldana alady.
Sonymen qatar, ońaılatylǵan deklarasıa negizinde arnaýly salyq rejımderin qoldaný sharty da ózgerdi, ıaǵnı 683 bapqa sáıkes, dara kásipker men zańdy tulǵaǵa bólinbeı, jalpy shart qoıyldy. Sondaı-aq, keden kodeksi boıynsha deklarasıalaý men baqylaý ýaqyty 24 saǵattan 4 saǵatqa deıin, jalpy baqylaý jumysy on kúnen bes kúnge deıin qysqartyldy.
Sonymen qatar, azamattarmen tyǵyz jumys júrgizip, keri baılanys ornatý maqsatynda «Qoǵamdyq baqylaý kartasy» ázirlendi. «Qoǵamdyq baqylaý kartasy» tanymal áleýmettik jeliler (Facebook, VK, Instagram jáne WhatsApp, Telegram 8-775-869-21-21) men koll-sentr (8 (7252) 51-51-51) arqyly júzege asyrylýda.
Forým barysynda salyq tóleýshiler men syrtqy ekonomıkalyq qyzmetke qatysýshylardyń týyndaǵan suraqtary talqylanyp, mamandarmen tolyqqandy jaýaptar berildi.
