Ońtústik Qazaqstan oblysy Shardara aýdany jaǵajaı týrızmin damytýǵa qolaıly aımaq. Shardara sý qoımasy jaǵalaýyndaǵy týrızm salasyn damytý boıynsha tıisti jumystar atqarylýda. Aldaǵy ýaqytta 255 gektar aýmaqta 60 nysan qurylysy júrgiziledi. Atap aıtqanda, qonaq úıler, ıaht klýb, restorandar, ańshylar jáne balyqshylar úıi, akvapark syndy ǵımarattar boı kóteredi. Búgin bul týraly OQO óńirlik komýnıkasıalar qyzmetinde ótken brıfıńte Shardara aýdanynyń ákimi Bolatbek Qystaýov málim etti, dep jazady Qamshy.kz aqparat agenttigi OQO ákimdiginiń baspasóz qyzmetine silteme jasap.
Aýdan basshysynyń aıtýynsha, týrısik aýmaqqa tartylatyn ınvestısıa kólemi 6,7 mlrd. teńgeni quraıdy. Atalǵan jobaǵa ınvestorlar qyzyǵýshylyq tanytýda. Bul jumystar iske asqan jaǵdaıda 1000-nan astam jańa jumys orny ashylyp, birneshe nysan boı kóteretin bolady. Nátıjesinde óńirge kelýshi týrıserdiń sany 45 myńnan asady dep josparlanýda.
Budan bólek, Shardara aýdanynda 19 kásiporyn jumys jasaıdy. Ótken jyly osy óndiris oryndarynda 7844,5 mln. teńgeniń ónimi óndirilip, 2016 jylmen salystyrǵanda 4,7 paıyzǵa artqan. «Indýstrıaldy-ınnovasıalyq damý baǵdarlamasy» aıasynda osy ýaqytqa deıin aýdanda jalpy quny 1482 mln. teńgeni quraıtyn 5 joba iske asyryldy.
«Aǵymdaǵy jyly ónerkásip ónimin 8960 mln.teńgege jetkizý josparlanǵan. «Indýstrıaldy-ınnovasıalyq damý baǵdarlamasy» sheńberinde aýdanǵa ınvestısıa tarta otyryp, aǵymdaǵy 3 birdeı jobany iske asyrý kózdelip otyr. Olardyń qatarynda jalpy jobalyq quny 200 mln. teńgeni quraıtyn óndiristik qýattylyǵy 600 tonnalyq «Baıterek BBM» JSHS-ń «Balyq óńdeý zaýytynyń qurylysy» bar. Qazirgi tańda qurylys jumystarynyń 70 paıyzy aıaqtalǵan. Sondaı-aq, óndiristik qýattylyǵy 20 myń tonnany quraıtyn «Aı-Kajy» Ak-altyn» JSHS-ń «Maqta óńdeý zaýytynyń qurylysy» jobasy bar. Úshinshisi, «Shardara GES» AQ-nyń qaıta jańǵyrtý jobasy. Atalǵan jobalardy iske qosý arqyly 400 adamǵa jańa jumys orny ashylady», - dedi Bolatbek Dúısenbekuly.
Sondaı-aq, «Bıznestiń jol kartasy-2020» kásipkerlikti qoldaý jáne damytý biryńǵaı baǵdarlamasy aıasynda aýdanda ótken jyly 14 jobaǵa qoldaý kórsetilip, óńirlik úılestirý keńesimen maquldanǵan.
