Ońtústik Qazaqstan oblysynyń ákimi J.Túımebaevtyń tóraǵalyq etýimen Qala qurylysy Keńesiniń otyrysy ótti. Onda Shymkent qalasynda iske asyrylǵaly jatqan «Shymkent City» iskerlik jáne turǵyn úı kesheniniń jobasy talqylandy. Iaǵnı, jańadan boı kóteretin qalashyqtyń konsepsıasyna birqatar ózgertýler men tolyqtyrýlar engizý jaıy sóz boldy.

Jıynda aımaq basshysy Shymkent qalasynda halyq sanynyń ósimin eskere otyryp, «Shymkent City» jobasynyń keıbir tustaryn qaıta qarap shyǵý kerek ekenin aıtty.

«Elbasynyń nazaryndaǵy bul jobanyń keı tustaryna túzetýler engizý kerek dep oılaımyn. Shymkent elimizdegi úshinshi megapolıs bolǵandyqtan munda demografıalyq ósim qarqyndy. Al, bolshaqta halyq sany eselep artatynyn eskersek, qalada kólikpen júrip turý aıtarlyqtaı máselege aınalary sózsiz. Sondyqtan jańa qalashyqta avtoturaqtar jetkilikti bolýyn, sondaı-aq kólik tyǵynyn boldyrmaý joldaryn qazirden oılaý kerek. Tıisti sala mamandaryna osy máseleni qaıta qarap shyǵýdy tapsyramyn», – dedi Janseıit Túımebaev.

Jıynǵa qatysqan jaýaptylar aımaq basshysynyń usynystaryna qoldaý bildirip, alda atqarylatyn sharýalarymen tanystyrdy.

Joba avtorlary usynǵan sońǵy nusqa boıynsha jalpy aýmaǵy 65,5 gektardy quraıtyn «Shymkent City» kesheninde 6762 orynǵa shaqtalǵan avturaq bolady dep josparlaǵan. Jalpy sany 5554 páterdi quraıtyn 18 qabatqa deıingi kóp qabatty turǵyn úıler boı kóteredi. Sondaı-aq, zamanaýı úlgidegi sáýletti mektepter, sport kesheni, oıynsaýyq ortalyqtary jáne de áleýmettik nysandar salynady.

Aıta keteıik, «Shymkent City» qalashyǵy shahardyń soltústik aımaǵynda, Báıdibek bı eskertkishiniń mańynda salynýda. Aýdan zamanaýı ınfraqurylymymen, turmysta, bıznesti bastaýda qolaıly jaǵdaıymen jáne eń joǵary qala qurylysy men sáýleti jaǵynan erekshelenedi. Atalǵan joba Shymkenttiń 2020 jylǵa deıingi damý tujyrymdamasy aıasynda iske asyrylýda.