Ońtústik Qazaqstan oblysynyń ákimi Janseıit Túımebaev Eýropalyq qaıta qurý jáne damý bankiniń Astana qalasyndaǵy Ókildiginiń basshysy A.Omarova bastaǵan jumysshy toppen kezdesti. Basqosý barysynda óńirde balamaly energıa kózderin óndiretin salaǵa ınvestısıa salý máselesi sóz boldy. Óńir basshysy aımaqta  qolaıly ınvestısıalyq klımat qalyptasqandyǵyn jáne ınvestorlarǵa barlyq jaǵdaılar men jeńildikter jasalynatynyn jetkizdi.

«Oblystaǵy 11 ındýstrıalyq aımaqta  170-ke jýyq ınvestısıalyq joba júzege asyrylýda. "Bıznestiń jol kartasy - 2020" baǵdarlamasy aıasynda memleket esebinen ındýstrıalyq aımaqtaǵy kásiporyndar ishki jáne syrtqy ınfraqurylymmen qamtamasyz etiledi.  EQDB-men birlesken ınvestısıalyq jobalardy júzege asyrý úshin óz tarapymyzdan yntymaqtasýǵa árqashan daıynbyz», - dedi Janseıit Qanseıituly.

Aıta keterligi, buǵan deıin aımaq basshysy EQDB-nyń Qazaqstandaǵy basshysy  Agrıs Preımanıspen júzdesken bolatyn. Bul kezdesýde jalpy quny 33 mln. evrony quraıtyn Shymkent qalasyn sýmen jabdyqtaý jobasy jáne   Shymkent-Tashkent avtomobıl jolyn salý men  Shardara GES-in jańǵyrtý syndy jobalardy júzege asyrý jaıy talqylanǵan.

Kezdesý sońynda Eýropalyq qaıta qurý jáne damý banki atalǵan jobalardy aldaǵy ýaqytta júzege asyrýǵa yntaly ekendigin jetkizdi.