Jýyrda arnaıy «Rýhanı jańǵyrý» baǵdarlamasy aıasynda Batys Qazaqstan oblysynyń týmasy, Keńes Odaǵynyń Batyry Súndetqalı Esqalıevtiń erligin zertteý, esimin ulyqtaý maqsatynda batyr babamyzdyń jerlengen jeri Belorýssıa Respýblıkasy,  Mogılev oblysy Byhov aýdany Lýdchısy derevnásyna baryp qaıtqan bolatyn.

Súndetqalı Esqalıev - 1924 jyly Batys Qazaqstan oblysy, Shyńǵyrlaý aýdanynyń Almaz aýyldyq okrýgine qarasty Aqqudyq (Konstantınovka) eldi mekeninde dúnıege kelgen. Ol 1942 jylǵy shilde aıynda áskerge alynǵan. 1944 jyly 556-atqyshtar polkiniń quramynda Mogılev oblysy Byhov aýdany Lýdchısy derevnásyn azat etýde máńgi óshpes erlik kórsetip, tarıhta batyr bolyp qaldy. Atap aıtqanda, maýsym aıynyń 23-nen 24-ne qaraǵan túngi shaıqasta toqtamastan oq boratqan jaý pýlemetine jer baýyrlap baryp laqtarǵan granatasy jarylmaı qalady. Osy sátte batyr Súndetqalı jaýynger ushyp turyp, ambrazýrany óz keýdesimen jaba qulady. Kedergi bolǵan pýlemettiń úni sonda ǵana óshedi. Osylaısha janqıarlyq erligimen S.Esqalıev óz joldastaryna jol ashqan edi.  A.Matrosovtyń erligin qaıtalap, nebári jıyrma jasynda qyrshyn ketken qazaq jigitine 1945 jyly 24 naýryzda Keńes Odaǵynyń Batyry ataǵy beriledi.

Batyr babamyzdyń erligin nasıhattaý maqsatynda Batys Qazazqstan oblysynan Belorýssıa eline Shyńǵyrlaý aýdandyq bilim bóliminiń basshysy A.Saparovtyń bastaýymen aýdannan jasaqtalǵan top Belorýssıa jerine saparǵa shyqty.

Súndetqalı babamyzdyń jerlengen jeri Byhovskide Taımanova derevnásynan úsh shaqyrym jerde ornalasqan baýyrlastar zıratyna baryp, rýhyna taǵzym etip, týǵan elinen bir ýys topyraǵy qoıyldy.

Búginde batyr qala Mınskiden, Byhovsk qalasy ortalyǵy kóshelerine Súndetqalı Esqalıevtiń esimi berilip, mektepte, mýzeıde arnaıy buryshtar ornalastyrylyp, belorýs pıonerleriniń esimin ánge qosatynyn qandaı qurmet ekenin baǵalaı berińiz!

Adaq Shotpanov