Zańǵa jarıa túrde qol qoıý rásiminde sóılegen sózinde Memleket basshysy táýelsizdik jyldary Qazaqstanda naryqtyq ekonomıkanyń berik ınstıtýsıonaldyq negizderi qalyptasqanyn aıtty.

– Jeke bastama men erkin kásipkerlik elimizdiń ekonomıkalyq damýynyń jáne ál-aýqatymyzdyń artýynyń basty faktoryna aınaldy. Bizdiń reformalarymyzdyń tabystylyǵy men tıimdiliginiń jarqyn mysaly retinde Astanany aıtýǵa bolady. Onyń 20 jyldyq mereıtoıyn búkil Qazaqstan atap ótýde, – dedi Nursultan Nazarbaev.

Qazaqstan Prezıdenti qol qoıylatyn «Qazaqstan Respýblıkasynyń keıbir zańnamalyq aktilerine kásipkerlik qyzmetti retteýdi jetildirý máseleleri boıynsha ózgerister men tolyqtyrýlar engizý týraly» zańnyń mańyzdylyǵyn erekshe atap ótti.

– Engizilip otyrǵan ózgeristerdiń basty maqsaty – bıznesti retteý salasyndaǵy zańnamany jetildire túsý. Zańda memlekettik baqylaý fýnksıalaryn shamamen 30 paıyzǵa qysqartý kózdelip otyr. Quqyq buzýshylyqtyń aldyn alatyn profılaktıkalyq baqylaý ınstıtýtyna basa mán berilgen. Tabıǵı monopolıalar men kvazımemlekettik sektor tarapynan kórsetiletin qyzmetter retteledi, – dedi Elbasy.

Sonymen qatar Memleket basshysy bıznes shyǵyndaryn jappaı tómendetý úshin zańda qarastyrylǵan sharalar jóninde jáne básekege kedergi keltiretin normalardyń alynyp tastalǵany týraly aıtty.

– Osy zań arqyly 14 kodeks pen 109 zańǵa shamamen 1 myńǵa jýyq ózgeris engizilip otyr. Osy ózgeristerdiń báriniń dittegen maqsaty bıznesti damytý úshin meılinshe qolaıly jaǵdaı qalyptastyrý jónindegi memlekettiń basty strategıalyq baǵytyna tolyq saı kelip otyr. Qazirgi ýaqytta iskerlik belsendilikti kúsheıtý jáne jurtshylyqty kásipkerlikpen aınalysýǵa tartý úshin barlyq múmkindikti paıdalaný asa mańyzdy, – dedi Nursultan Nazarbaev.

Sóz sońynda Qazaqstan Prezıdenti búginde júzege asyrylyp jatqan «Bes áleýmettik bastama» shaǵyn jáne orta bıznes úshin zor múmkindik týǵyzyp otyrǵanyn atap ótip, osy zańnyń qabyldanýy halqymyzdyń ıgiligi jolynda eldegi kásipkerlik qyzmetti jandandyrýǵa tyń serpin beretinine senim bildirdi.