2018  jyldyń 22-24 mamyr kúnderi Almaty qalasynda «Evolúsıanyń 15 jyly: álem ózgerisi men bizdi ózgertýi» taqyrybynda  ótken XV Eýrazıalyq Medıa Forýmy óz jumysyn aıaqtady, dep habarlaıdy Qamshy.kz aqparat agenttigi forýmnyń baspasóz ortalyǵyna silteme jasap.

 Jalpy úsh kúnge sozylǵan forým 60-tan astam elden 500-den asa delegattardy jınady. Álemdik sarapshylar forýmǵa oń pikirin bildirip, ortalyq Azıadaǵy táýelsiz dıalog alańy degen baǵa berdi.

Bul rette forým óz mısıasyn tolyǵymen oryndady dep aıtýǵa negiz bar. Sebebi,  Qazaqstannyń, Eýrazıanyń, tipti búkil álemdik qaýymdastyqtyń ekonomıkalyq, geosaıası, áleýmettik mádenı máseleleri osy forým alańynda talqylandy.    

Forýmnyń jabylý saltanaty Darıǵa Nursultanqyzynyń qorytyndy sózimen aıaqtaldy. Ol osy úsh kúndi qazirgi medıanyń kókeıkesti máselelerine qatysty qyzyqty  pikirtalas jáne talqylaýmen este qalatynyn jetkizdi. Sonymen qatar, on besinshi forýmnyń erekshiligine toqtalyp ótti.

«Biz sońǵy on bes jylda buqaralyq aqparat quraldary bastan keshken ózgeristerdi baǵalaýǵa, oı eleginen ótkizýge tyrystyq. Ózgerister túbegeıli. Forýmdaǵy pikirtalas osy tujyrymdy dáleldep berdi. Sondaı-aq, On besinshi mereıtoılyq Eýrazıa Medıa Forýmy bizdiń basty jetistigimiz, bizdiń basty qundylyǵymyz – sizder, forýmǵa qatysýshylar, spıkerler men moderatorlar», - dedi ol óz sózinde.

İs-sharanyń bas seriktesi «Samuryq-Qazyna» ulttyq ál-aýqat qory» Aksıonerlik Qoǵamyna, barlyq sheteldik jáne otandyq BAQ ókilderine, spıkerler men uıymdastyrýshylarǵa, sondaı-aq eriktilerge alǵysyn aıtyp, sózin támamdady.