Jýyrda Saıragúl Saýytbaı atty qandasymyzdy Qytaıǵa kúshtep qaıtarǵaly jatyr degen aqparat tarady. Ózin Saıragúldiń qaınysymyn dep tanystyrǵan er adam vıdeoúndeý jasap, el-jurttan kómek surady.

Bul oqıǵaǵa búkil qazaq alańdady. Áleýmettik jelide Saıragúl Saýytbaıǵa arasha suraǵandar kóp boldy. Osyǵan baılanysty Qamshy.kz aqparat agenttigi QR UQK Shekara qyzmetine resmı saýal joldaǵan edi. Quzyrly mekemeden tómendegideı jaýap keldi.

"Qytaıdyń quqyq qorǵaý oryndary 1976 jyly týǵan QHR azamaty Saıragúl Saýytbaıǵa izdeý salǵan edi. Ol "Qorǵas" SHYHO-nyń qytaılyq bóligine QHR jaqtan jeke kýálik pen bir rettik ruqsatnama arqyly kirip, Qytaıǵa qaıtyp oralmaǵan.

Saıragúl Saýytbaıdyń QR aýmaǵyna kiretin zańdy quqyǵy bolmaǵan. Sebebi onyń QKP múshelerine shetelge shyǵýǵa múmkindik beretin tólqujaty tartyp alynǵan (balabaqsha meńgerýshisi bolyp jumys istegen).

Sáýir aıynda Qytaıdyń shekara qyzmetindegi jemqor sheneýnikterdiń kómegimen "Qorǵas" SHYHO-ǵa kiretin jalǵan ruqsatnama jasap alyp, shekarany zańsyz kesip ótken.

QR UQK Shekara qyzmetiniń ókilderi onyń kúıeýimen birge Báıdibek bı aýylynda turyp jatqanyn anyqtady. QHR-dan QR-ǵa memlekettik shekarany zańsyz kesip ótý faktisi boıynsha qylmystyq is qozǵaldy".

Árıne, qany bir qazaq azamatynyń atajurtynda turaqtaı almaı, otbasynan jyraqqa ketip bara jatqany bárimizdi qynjyltady. Alaıda Qazaqstan Respýblıkasynyń zańy bar, Qytaımen eki aradaǵy kelisim bar. Bala-shaǵasyna asyǵyp, analyq júreginiń ámirimen zań buzǵan Saıragúldiń jaǵdaıy janymyzǵa batady. Elimizdiń quzyrly oryndary shekaranyń eki jaǵynda qalǵan qazaqtardyń janaıqaıyna qulaq asyp, halyqaralyq normalarǵa júgine otyryp, kúrmeýi qıyn kúrdeli máseleni sátimen sheshedi dep senemiz.