Almaty ákimi Baýyrjan Baıbek jumys sapary barysynda Ortalyq mádenıet jáne demalys saıabaǵynyń aınalasyn qarap shyqty. Basqarýshy kompanıa 1,6 mlrd. teńge jeke ınvestısıa bólingen rekonstrýksıanyń keshendi josparyn kórsetti.

Jańarǵan saıabaq aımaqtarǵa bólinedi, munda tegin skeıtodrom, vorkaýt jáne komandalyq oıyndar alańdary bar sport aýmaǵy, balalardyń jańa qalashyǵy paıda bolady. Jańa ári zamanaýı atraksıondar jasalady.

Taıaý arada trotýarlardy jóndeý bastalady, jaryq kózderi ornatylyp, fontandar jańarady. Zamanaýı talapqa saı kelmeıtin saýda obektileri alynyp tastalady. Memlekettik - jeke áriptestik qaǵıdasy boıynsha sonaý 90–shy jyldan beri jumys istemeı turǵan «Velotrek» qaıta jasalady.

Qosymsha aǵash otyrǵyzylyp, qala saıabaǵynyń ortasyndaǵy kólik turaǵyn jabý esebinen asfáltbeton tóselgen aýmaq qysqarady.

Aıta keterligi, qurylys jumystary kelýshilerge qolaıly bolý úshin kezeń boıynsha júretin bolady.

Aıta keterligi, Almatyda bıylǵy jazda 150-den astam kóshe jóndeledi, 30 km trotýarlar jasalady, 600 aýla kóriktendiriledi. Barlyq jer asty ótpeli joldar kúrdeli jóndeledi, jańa fontandar salynady. Buryn qaıta jasalǵan Panfılov, Jibek Joly, Gogol, Qabanbaı batyr, Baıseıitova, Tólebaev kósheleri men «Astana» alańynan ózge megapolıstiń birqatar negizgi dańǵyldary túgeldeı jańarady.