Jaıly qala keńistigin qalyptastyrý maqsatynda bıylǵy jyly burynǵy jeti sýburqaqty qaıta jóndeý jáne toǵyz jańa fontan salý josparlanǵan. Almaty ákimi Baýyrjan Baıbek buryndary qalanyń tarıhı ortalyǵyn jańartý barysynda eskerýsiz qalǵan fontandardy qalpyna keltirý boıynsha tapsyrma bergen edi.

Ulttyq kitaphana, «Jetisý» qonaqúıi, Abylaı han men Shevchenko kósheleriniń qıylysyndaǵy jáne basqa da jerlerdegi burynnan bar sýburqaqtardy qaıta jasaý josparlanǵan. Jańa fontandar Abaı, Nazarbaev, Abylaı han dańǵyldary men Gogol, Jibek Joly, Mametova jáne Raıymbek kósheleriniń arasyna salynady.

Baseın ydysy sıaqty dásúrli fontandarmen qatar «qurǵaq sýburqaqtar» da iske qosylýda, munda aınalmaly sý júıesi, sýdyń bıiktigi eskerilgen. Túrli projektorlar arqyly galogendi jáne júzgish shyraq syndy jaryq kózderi ornatylady.

Aıta keterligi, buryn qaıta jańarǵan Panfılov, Jibek Joly, Gogol, Qabanbaı batyr, Baıseıitova, Tólebaev kósheleri men «Astana» alańyna qosa bıylǵy jyly megapolıstiń birqatar dańǵyldary da jańarady.

Ortalyqtandyrý qaǵıdasy boıynsha qalanyń barlyq aýdandarynda abattandyrý jumystary júrýde. Eger ótken jyly 455 aýla jańarsa, 2018 jyly qosymsha 585 aýla modernızasıalanady.

Jalpy, sońǵy jyldary megapolıste 180 km jol jáne 700 km ınjenerlik jeliler salynyp, jóndeldi, birqatar jolaıryqtarynyń qurylystary júrýde, magıstraldy kósheler úńgilenýde. Bıylǵy jyly uzyndyǵy 155 km bolatyn 157 kóshe men 30 shaqyrymnan asatyn júrginshi trotýarlaryn jóndeý josparlanǵan.