Jeńis kúni qarsańynda Almaty ákimi Baýyrjan Baıbek qalanyń ardagerler keńesiniń ókilderimen kezdesti. Kezdesý barysynda ardagerler men qart adamdarǵa áleýmettik qoldaý kórsetýdiń birqatar mańyzdy máseleleri talqylandy.

Búgingi kúni Almatyda 222 myń zeınetkerler turady nemese olar qalanyń barlyq turǵyndarynyń 12,5%-yn quraıdy. Egde jastaǵylardy megapolıstiń belsendi ómirine tartý jáne aǵa urpaqqa qoldaý kórsetý maqsatynda qala basshylyǵy «Belsendi uzaq ómir» jobasyn jasaǵan edi.

«Komýnaldy jáne komersıalyq menshikte bıylǵy jyly qalanyń barlyq aýdandarynda 40-tan astam áleýmettik klýbtar ashý josparlanǵan. Jazǵa qaraı belsendi ómir Ortalyǵy salynady, munda qalanyń egde jastaǵy turǵyndary kitaphanaǵa, fıtnes- zaldarǵa baryp, emdik ıogamen aınalysady, shahmat,toǵyzqumalaq, domıno zaldary jumys isteıdi», -dep habarlaıdy ákimdiktiń baspasóz qyzmeti.

Joba aıasynda turaqty negizde kompúterlik aǵartý, aǵylshyn tili, motıvasıalyq semınarlar jáne sheberlik synyptary uıymdastyrylady. Zań, psıhologıalyq, medısınalyq keńester tegin kórsetiledi.Biryńǵaı Call-center qurylady, onyń negizinde senim qyzmeti jumys istep, áleýmettik qyzmetter men nysandar týraly aqparattar alýǵa bolady.

Zeınetkerlerdi belsendi ómirge tartý úshin 100-den asa mádenı, sporttyq jáne zıatkerlik sharalar, sonymen qatar bos oryndardyń arnaıy jármeńkesi ótedi.

Jeńis kúnin merekeleý aıasynda aýdan ákimdikteri medısınalyq mekemelerde Ashyq esik kúnderin,taqyryptyq konsertter ótkizip,kınofılmder kórsetedi, kezdesýler uıymdastyryp, ardagerlerdi úılerine baryp quttyqtaıdy.

«Bıylǵy jyly Uly Otan soǵysy ardagerlerine kórsetiletin birrettik áleýmettik kómek máslıhattyń sheshimimen 150 den 250 myń teńgege, olarǵa teńelgenderge 30 dan 50 myń teńgege kóbeıgen. UOS ardagerlerine komýnaldyq qyzmet tólemi úshin aı saıyn kórsetiletin kómek 5,5 ten 6,5 –ge deıingi AEK ósken», - dedi ákimdikte.