Almatyda jumyspen qamtý ortalyǵynda probasıa qyzmetiniń esebinde turǵandarmen kezdesý ótip, olarǵa áleýmettik-quqyqtyq qyzmet kórsetildi.
Bas bostandyǵy shektelgen azamattardy turaqty jáne ýaqytsha jumys oryndarymen qamtamasyz etý, qysqa merzimdi oqytý, sondaı-aq kásibin dóńgeletkisi keletinderge jylyna 6% mıkrokredıt berý máselesi qaralýda.
Qalalyq halyqty jumys pen qamtý ortalyǵy dırektorynyń aıtýynsha, ótken jyly probasıa qyzmetinde esepte turǵan 117 adam ortalyq qyzmetine júgingen.
«Probasıa qyzmetinde esepter turǵandar bizge kez-kelgen ýaqytta habarlasyp, ózderiniń ótinishterin bildire alady. Biliktiligin arttyram degenderdi qysqa merzimdi oqýǵa jiberemiz. Bul qyzmet tegin kórsetiledi, qosymsha stıpendıa taǵaıyndalady. Ótken jyly ótinish bildirgenderdiń ishinen 40 adamǵa kómegimiz tıdi. Onyń ishinde 11 adamǵa turaqty jumys ornyn taýyp berdik, qoǵamdyq jumystar men qysqa merzimdi oqýǵa jiberilgenderi boldy»-dedi qalalyq halyqty jumys pen qamtý ortalyǵy dırektory Meıram Súıindikov.
Probasıa qyzmeti bóliminde esepte turatyn azamatshaǵa (aty-jónin kórsetpeýdi surady) áleýmettik -quqyqtyq kómek retinde biliktiligin arttyrý múmkindigi berilgen.
«Men qazir shashtaraz mamandyǵyna oqyp jatyrmyn. Probasıa qyzmeti men halyqty jumyspen qamtý ortalyǵynyń osyndaı múmkindikti usynyp otyrǵanyna óte qýanyshtymyn. Kez-kelgen adam qatelesýi múmkin»-dedi sottalýshy.
Jetisý aýdany probasıa qyzmetiniń aǵa ınspektory Janar Anabıeva mundaı múmkindik sottalýshylardyń qoǵamǵa beıimdelýine kómektesetinin aıtty.
«Búginde halyqqa qyzmet kórsetý ortalyǵymen jumys jasap jatyrmyz. Jaýapqa tartylǵandyń ishinde qysqa merzimdi oqýdy bitirgen Berikbol Jańabaev Mamyr-7 PIK-de metal dánekerleýshi bolyp, Chabanov Vıktor qurylys fırmasynda jumys isteıdi. Taǵy bir sottalýshymyz shashtaraz mamandyǵyn úırenip jatyr. Keıin jumysqa ornalastyrý jaǵy qarastyrylady»-dedi Jetisý aýdany probasıa qyzmetiniń aǵa ınspektory Janar Anabıeva.
Kezdesý nátıjesi boıynsha jaýapqa tartylǵandardyń 5-ýi biliktiligin arttyrýǵa joldama alsa, 1 adam mıkrokredıt alý úshin qujat daıyndaýǵa kirisetin boldy. Taǵy 5-ýi qysqa merzimdi oqýǵa jazylyp, keıin jumysqa turý úshin ótinish berdi.
