Almatyda  qyzyl túske boıalǵan ózen sýynan synama alyndy.

Qalalyq Qoǵam densaýlyǵyn qorǵaý departamentiniń basshysy Aızat Moldaqasymova zertteý nátıjesi 3 kúnnen soń daıyn bolatynyn aıtty.

«20 mamyrda 19:30-da TJD jelisinen osyndaı aqparat tústi.  Qazir Úlken Almaty ózeniniń boıyn túgel sharlap shyqtyq. Bir jerden qyzyl tús baıqamadyq. Biraq, sonda da ózenniń barlyq tusynan synama aldyq. Sanıtarlyq-hımıalyq quramy búgin keshke deıin belgili bolady. Sýdyń bakterıalyq quramy 3 kúnnen soń belgili bolady», - dedi Aızat Moldaqasymova.

Departament basshysy vıdeony  áleýmettik jelige jarıalaǵan tulǵalarmen baılanysyp jatqanyn habarlady.

«Bir ǵana vıdeoǵa qarap eshteńe aıta almaımyz. Taratqan adamdy taptyq. Qazir ol túsirgen jerden taǵy synama alamyz», - dedi ol.

Sonymen qatar, quzyrly organdar ózen boıynda ornalasqan barlyq hımıalyq kásiporyndardy tekserýdi bastaǵan.

«TQKO, lak boıaý ónimderin shyǵaratyn, výlkanızasıa, tıpografıa sıaqty óndiris oryndary tekserilip jatyr», - dedi departament basshysy.

Munyń aldynda atalmysh vıdeo vatsap jelisi arqyly taralǵanyn jarıalaǵan edik.