Ýkraınalyq «Golos.Ditı» shoýynyń jeńimpazy, Qazaqstandyq jas ánshi Danelıa Tóleshova alǵashqy konsertin ashyq aspan astynda ótkizedi.

Bul keshte Danelıa 10-ǵa jýyq án oryndaıdy. Onyń ishinde «Golos.Ditı» jobasynan jáne avtorlyq ánder jáne kaverler bar. Jas ánshi alǵashqy konsertin týǵan qalasynda ótkizýdi qalaǵan eken.

«Bul jerde meniń otbasym, týǵandarym, dostarym bar. Birinshi qadamymdy týǵan qalama  jáne jaqyndaryma arnaımyn. Bul - anam ekeýimizdiń ıdeıamyz. Aldyn ala konserttiń qalaı ótetinin elestetip, baǵdarlamany jasadyq. Daıyndalyp júrgenimizge uzaq ýaqyt boldy», - dedi Danelıa Tóleshova.

Jandy daýysta ótetin keshte halyqaralyq konkýrstar men jobalardyń fınalısteri, Danelıanyń ózi oqıtyn «IýNA» prodúserlik ortalyǵynyń daryndy oqýshylary óner kórsetedi. Kesh jarty saǵat kólemine  josparlanǵan.  Keshti «Hochý k Meladze» jobasynyń fınalısi Farız Mamedov júrgizdi.

 «Osy kesh arqyly jankúıerlerimmen kezdesýdiń múmkindigi týyp tur. Bul men úshin úlken jaýapkershilik, meni kútken kórermenniń kóńilinen shyǵýǵa tyrysamyn», - dedi Danelıa Tóleshova.

Konsert 27 mamyr kúni saǵat 18.00-de «MEGA Alma-Ata» saýda, oıyn-saýyq ortalyǵynyń amfıteatrynda ótedi.