«Almaty qalasy mýzeıler birlestigi» KMQK fılıaly Almaty mýzeıinde Vengerlik shyǵystanýshy, geograf Dórd Almashıge arnalǵan memorıaldyq belgi taqtasy qoıyldy.

Saltanatty sharaǵa Almaty ákiminiń orynbasary Arman Qyryqbaev, Vengrıanyń bas konsýly Iýdıt Lang jáne ólketanýshy, etnograf ǵalymdar qatysty. Dórd Almashı - Ortalyq Azıa halqyn álemge alǵash tanystyrǵan Majar saıahatshysy.

Ol osydan 100 jyl buryn Alataý, Tán-SHan syndy Qazaqstannyń birqatar jerlerinde bolyp, etnografıalyq zertteýler júrgizgen. Al 1903 jyly  «Azıa júregine saparym» atty eńbegi jaryq kórgen.

Jıynda sóz alǵan túrkitanýshy, etnograf Davıd Shomfaı Kara majar ǵalymy Dórd Almashı qaldyrǵan qundy eńbekter óziniń etnografıalyq zertteýine arqaý bolǵandyǵy týraly aıtty.

«Men ózim zertteýshi retinde XX ǵasyrdyń aıaǵyndaǵy Jetisý beınesin bilsem, Dórd Almashıdiń kitabynan XX ǵasyrdyń basyndaǵy Jetisý óńirin tanydym.  Júz jyl ishinde kóp nárse ótip ketken», - dedi Davıd Shomfaı Kara. 

Saltanatty shara aıasynda Dórd Almashıdiń muraǵatynan ejelgi Qazaqstan ólkesiniń sýretteri kópshilik nazaryna usynyldy. Túrkitanýshy ǵalym Ishtvan Shanta mundaǵy sýretter saıahatshynyń Ortalyq Azıaǵa 1906 jylǵy ekinshi ret sapary kezinde túsirilgenin málim etti.

«Sýretterdiń kóbi ekinshi dúnıejúzilik soǵys kezinde joǵalyp ketken. Ǵalymmen birge saıahattaǵan aǵylshyn dosynyń urpaqtary tapsyrǵan sýretterdi kórmege ákeldik. Onda da sapasy jaqsy degenderinen 30 shaqty sýret qoılyp otyr», - dedi Ishtvan Shanta.