Bıyl Almatyda ótetin «Bala daýysy» án baıqaýyna 4 myńǵa jýyq bala qatysady. Naýryzdyń 15-i men sáýir aıynyń 15-i aralyǵynda ótetin dodaǵa 8 jastan 12 jasqa deıingi balalardan 3 765 onlaın-ótinim kelip túsken, dep habarlaıdy QazAqparat tilshisi.

Uıymdastyrýshylardyń aıtýynsha, bul baıqaý tarıhyndaǵy rekordtyq kórsetkish bolyp otyr.

«Aldyn-ala irikteý nátıjesi boıynsha jandy daýysta tyńdaýdan ótý úshin 14 oblystan 80 bala Almaty jáne Astana qalalaryna shaqyrtý aldy. İrikteý kezeńinde kásibı tóreshiler Maıra Muhamedqyzy, Jeńis Seıdollauly, Maqpal Isabekova jáne Áset Arystanbek tórelik etedi. Eki kún ishinde balalar ózderiniń jankúıerlerin tek qana vokaldyq qana emes, bıshilik jáne ártistik qabiletterimen tań qaldyrady. Tóreshiler 80 balanyń ishinen ár oblystan 1 jáne Almaty, Astana qalalarynan 2 qatysýshydan iriktep alady. Olar qyrkúıek aıynda televızıalyq sýper-fınalǵa daıyndyq ótetin «Bala daýysy» juldyzdy úıine barýǵa múmkindik alady. Jas ónerpazdar munda vokal, akterlik sheberlik, horeografıa, sán óneri jáne sahna tili sabaqtaryn oqıdy», - dedi uıymdastyrýshylar.

24-qyrkúıekten bastap jas ánshilerdiń ónerin telekórermender baǵalaıtyn bolady.

1 aıdan asa ýaqyt aralyǵynda telekórermender «Halyq súıiktisi» atty arnaıy syıdyń ıegerin anyqtaıdy. Al 8-jeltoqsanda tikeleı efırde qazylar alqasy «Bala daýysy» III maýsymynyń jeńimpazyn ataıdy. Jeńimpaz Ulttyq óner akademıasynyń oqý grantyn jeńip alady jáne Dısneılendke joldama alady.

Ár fınalıst baıqaý qorytyndysyna qaramastan arnaıy jasalǵan sıqyrly nota jáne uıymdastyrýshylardyń arnaıy syılyqtaryna ıe bolady.