Búgin Shahmat akademıasynda ótken baspasóz máslıhaty barysynda jas shahmatshy Jansaıa Ábdimálik erler arasyndaǵy grosmeıster normasyn qashan oryndaıtynyn aıtty.

Almatylyq Jansaıa Ábdimálik byltyr qarashada 20 jasqa deıingiler arasynda álem chempıony atandy. Búginde ol 3 normany oryndady.

2011 jyly - áıelder arasyndaǵy halyqaralyq sheber  ataǵyn, 2014 jyly - áıelder arasyndaǵy grosmeıster, 2017 jyly - áıelder arasyndaǵy halyqaralyq sheber ataǵyn jeńip aldy.

Búginde 18-ge endi kelgen shahmatshy boıjetken erler arasyndaǵy grosmeıster normasyn oryndaýǵa nıettenip otyr.

«Reıtıńte 2 500 pýnktine jetýim kerek. Qazir meniń reıtıńim 2 484 bolyp tur. 16 pýnktten ótsem boldy, resmı túrde ataq usynylatyn bolady. Jaqynda Ispanıaǵa ushatyn bolamyn. Týrnırde álemdegi eń kúshti sportshylarmen baq synasamyn. Qalǵan pýnktterdi sol jaqta jınap kelý oıymda bar», - dedi J.Ábdimálik.

Álemde bul nátıjege 18 nemese odan jas kezinde 4 sportshy qyz jetken. qytaılyq Ho Fan, úndistandyq Hampı Konerý 15 jastarynda normany oryndaǵan. Al, majar qyzy Iýdıt Polgar - 16 jasynda, reseılik Ekaterına Lagno 18 jastarynda jetti.

Joly bolsa Jansaıa Ábdimálik jas kezinde erler grosmeısterin oryndaǵan álemdegi besinshi arý bolmaq.

Aıta ketý kerek, kóbine álem chempıony ataǵyn alǵan qyzdar bul ataqqa 20-25 jastarynda qol jetkizgen.

«Bıyl qyrkúıekkte FIDE Assambleıasynyń otyrysyna deıin qazaqtyń qyzy Jansaıa Ábdimálik Ortalyq Azıadaǵy erler arasyndaǵy grosmeıster ataǵyn jeńip alǵan tuńǵysh qyz bolaryna senimdimin», - dedi Qazaqstan Shahmet federasıasynyń atqarýshy dırektory Irına Grıshenko.

Búginde Jansaıa ýaqytyn sportpen aınalysýǵa kóbirek arnap júr.

«Tańerteń baseınge baramyn. Shahmatshylar úshin fızıkalyq daıyndyq óte mańyzdy. Sebebi, tapjylmaı 2-2,5 saǵat otyrý úshin úlken tózim kerek. Sodan soń akademıadaǵy bapkerlerimmen jattyǵý partıalaryn jasaımyn. Túski astan soń ýkraınalyq bapkerimmen skaıp arqyly jattyǵamyn. Basqa nárselerge ýaqytym múlde joq»,- dedi Jansaıa Ábdimálik.