Almaty qalalyq Tótenshe jaǵdaılar departamenti qaladaǵy sel júrý qaýpin ınovasıalyq tehnologıalar arqyly baqylaıtyn boldy. Bul týraly búgin óńirlik komýnıkasıalar qyzmetinde ótken baspasóz máslıhaty barysynda departament basshysynyń orynbasary Erlan Álibekov aıtty.
«Qazir taý kólderinde, ózen ańǵarlarynda sel júrý qaýpin baqylaıtyn gıdrobeketter ornatylady. Bul ádister búginde eskirdi. «Sıfrly Qazaqstan» memlekettik baǵdarlamasy aıasynda sel júrý qaýpin baqylaýdyń avtomatty júıesin engizip jatyrmyz. Júıe arqyly Almatynyń taýlaryndaǵy kólder men ózenderdiń ańǵaryn onlaın rejimde baqylap otyrýǵa múmkindik týady», - dedi qalalyq Tótenshe jaǵdaılar departamenti basshysynyń orynbasary Erlan Álibekov.
Onyń aıtýynsha, 2017 jyly qalalyq TJD Úlken Almaty men Kishi Almaty, Qarǵaly, Aqsaı ózenderiniń ańǵaryn baqylaýǵa múmkindik beretin júıe jasaǵan.
Sıfrlyq baqylaý jumystaryn 2020 jylǵa deıingi ýaqytta aıaqtaý josparda bar. Oǵan 56 mln teńge qarjy bólingen.
Sonymen qatar, bıyl qaýipti jaǵdaıdyń qalyptasý múmkindigin zertteýge qosymsha 27 mln teńge bólingen. Bul qarjyǵa Kishi jáne Úlken Almatyda geoaqparattyq júıeler engiziletin sel kartasy jasaldy.
«Dál qazir morena kólderi muz qursaýynda jatyr. Maýsymda bógendi buzyp ketýi múmkin degen 7 kólden sýdy sorǵyzý jumystary bastalady» - dedi E. Álibekov.
