Almatyda «Batyr» Prezıdent polkiniń 0111 áskerı bóliminde Otan qorǵaýshylar kúnine oraı saltanatty jıyn ótti.
Atalǵan polktiń birqatar jaýyngeri Otan aldynda qaltqysyz qyzmet etken úshin «Minsiz qyzmeti úshin» İ-İİ-İİİ dárejeli medalimen marapattaldy.
Sonymen qatar, sarbazdarǵa Medeý aýdandyq ákimi men QR Memlekettik kúzet qyzmeti basshysynyń alǵys hattary tabys etildi.
«Búgingi táýelsiz elimizdiń áskeri - bizdiń ata-babalarymyzdyń jaýyngerlik dástúriniń zańdy jalǵasy. Sondyqtan da, qalyptasqan ıgi dástúr boıynsha jyl saıyn Qazaqstan Qarýly Kúshteriniń qurylǵan kúni - Otan qorǵaýshylar kúnin merekelep kelemiz. Soǵan baılanysty, Qarýly Kúshterimizdiń abyroıyn asqaqtatar sarbazdarymyzǵa qandaı qurmet kórsetsek te, jarasary sózsiz. Aspanymyzdyń ashyq, el baqytynyń baıandy bolýy - áskerı jaýyngerlerimizdiń qolynda ári keler urpaqtyń enshisinde», - dedi Medeý aýdany ákiminiń orynbasary Maılybaev Ǵanı.
Saltanatty shara otandyq estrada juldyzdarynyń merkelik konsertine ulasty.
Aıta keteıik, Qazaqstan Respýblıkasy Memlekettik kúzet qyzmetiniń «Aıbyn» jáne «Batyr» prezıdenttik polkteri qazaqstandyq armıanyń elıtasy bolyp esepteledi. Eń úzdik áskerı qyzmetshilerdi bir arnaǵa toǵystyrǵan qyzmettiń bul qurylymdyq bólinisterine irikteý ári qatań talaptarǵa saı júrgiziledi.
2012 jylǵy 16 aqpandaǵy «Áskerı qyzmet jáne áskerı qyzmetshilerdiń mártebesi týraly» Zańyna sáıkes jylyna eki ret respýblıka boıynsha bozbalalardy áskerge shaqyrtý jumystary bastalady.
Qyzmettiń ofıserlerimen tildesip, Qazaqstan Respýblıkasy Memlekettik kúzet qyzmeti týraly tolyqqandy aqparat alǵannan keıin, áskerge shaqyrylýshylardyń kópshiligi dál osy elıtaly qurylymdarǵa, ıaǵnı «Aıbyn» jáne «Batyr» prezıdenttik polkterine shaqyrylýdy qalaıtyndyqtaryn jasyrmaıdy. İrikteý barysynda bekitilgen ereje-talaptarǵa sáıkes eń bastysy Otanǵa degen sheksiz adaldyǵymen, shynshyldyǵymen, oqys jaǵdaılarda jalǵyz ári naqty sheshim qabyldaı bilý qabiletimen, tózimdi ári denesi shymyr kelgen jáne zerektigimen erekshelengen bozbalalarǵa basymdylyq beriletini sózsiz.
Sporttyq jáne ózge de salalardaǵy eleýli jetistikteri áskerı boryshtaryn dál osy prezıdenttik polkterde óteýge joldama retinde qarastyrylatynyn aıta ketken jón.
