Almaty zoobaǵynyń bolashaqta qalaı túrlenetini jaıly baspasóz máslıhaty barysynda zoobaq basshysy Aıgúl Tóleeva aıtyp berdi.

Bıyl 12 ǵımaratty jóndeýge 236 mln teńge bólingen. Qurylys-montaj jumystary jaqyn arada bastalyp, jyl sońyna deıin jalǵaspaq.

«Jóndeý jumystary barysynda biz jeldetý júıesin de jóndeıtin bolamyz. Qazir zoobaqtyń ishinen jaǵymsyz ıis shyǵatyny ras. Endi pilderdiń, leopardtardyń, kengýrý, men birqazandardyń qysqy úılerindegi jeldetkish júıesi tolyq jasalatyn bolady», - dedi Aıgúl Tóleeva.

Qazir qurylys jumystary Almaty zoobaǵyn qaıta jańǵyrtý jobasyna saı júrgizilip keledi.

Nemis sáýletshisi Pıter Razbahtyń jobasy boıynsha Almaty zoobaǵy toksonomıalyq tıpten kontınentaldy tıpke túrlenbek.

Atap aıtqanda, pilder, zebralar men kerikter bir arealda ómir súretin bolady.

Qazir qar barystary men aıý-qasqyr keshenderi boıynsha jobalyq smetalyq qujattama daıyn tur.

«Qar barysy ekspozısıasynda eki eresek barys pen kúshikteri turatyn bolady. Aýmaǵy 3 773 sharshy metr, voler aýmaǵy 618 sharshy metr, sýat kólemi 8,9 sharshy metr bolmaq. Aıý-qasqyr ekspozısıasynda 4 eresek qara aıý, 4 eresek gımalaı aıýy, 8 qasqyr ómir súretin bolady.

Olardyń turǵyn jaıynyń kólemi 8 932 sharshy metr bolmaq», - dedi Aıgúl Tóleeva.

Onyń aıtýynsha, veterınarlyq emhananyń jobalyq smetalyq qujattamasy daıyndalyp jatyr.

Osy ýaqytqa deıin gımalaı aıýlary men aq aıýlardyń, jolbarystardyń, tapırlerdiń ekspozısıalary qaıta jóndeldi. Zoobaqtyń ekzotarıýmy qaıta jasaldy.

«Bıyl 29 naýryzda akvarıým ashyldy. Alǵash ret akarıýmda 25 tonnalyq baseın paıda boldy. Qustar úıi qaıta jasaldy», - dedi zoobaq basshysy.