Qazaq kúresinen dástúrli «Almaty Barysy» týrnıriniń chempıony Túrksib aýdanynyń balýany Dáýren Nuralınov atandy, dep xabarlaıdy aqparattyq jáne sporttyq hab.

Baıraqty básekeniń aqtyq máresinde ol Medeý aýdanynan kelgen byltyrǵy chempıon 132 kelilik Rýslan Abdrazaqovty jeńdi. Jeńimpazdyń ózi 122 keli salmaqta básteskenimen, qarsylasyn tize búktire aldy.

«Men týrnırdi utqanym úshin qýanyshtymyn. Jarysqa jaqsy daıyndaldym, fınalda qarsylasym da myqty boldy. Rýslandy jaqsy bilemin, ol ataqty ári úzdik sportshylardyń biri. Endi, alda «Qazaqstan Barysy», jeńiske jetemin degen úmittemin», - dedi Dáýren Nuralınov.

Al úshinshi oryndy Túrksib aýdanynyń balýany Jaıdar Saılaýbaev pen Eldar Nasıev (Alataý aýdany) sarapqa saldy. Bul jekpe-jekte jeńiske Jaıdar Saılaýbaev jetti. Ol qola belbeýi men 100 myń teńgeni qanjyǵasyna baılady.

Týrnır chempıonyna lada prıora kóliginiń kilti men altyn belbeý, ekinshi oryn ıegerine 300 myń teńge kólemindegi aqshalaı syılyq pen kúmis belbeýi tabystaldy. Endi olar «Kazaqstan Barysy-2018» týrnırinde Almatynyń namysyn qorǵaıtyn bolady.

Eske sala ketsek, boz kilem básekesi Balýan Sholaq atyndaǵy sport saraıynda ótti. Qalamyzdyń eń aýqymdy sport sharalarynyń birine aınalǵan jarysqa aýdandyq jarystardan iriktelgen úzdik palýandar ózara myqtyny anyqtady. Kúres alańynda Almatynyń 8 aýdanynan kelgen 24 balýan ózara baq synasty. 

Aıtýly dodanyń salnatty ashylý rásiminde Almaty qalasy dene shynyqtyrý jáne sport basqarmasynyń basshysy Ábil Dóńbaev qatysýshylarǵa sáttilik pen jarqyn jeńis tiledi.

«Búginde, qazaq kúresi elimizdegi sport túrleriniń halqymyzǵa keńinen tanymal, el súısinip tamashalaıtyn, naǵyz tekti kúres túri. Al «Almaty Barysy» týrnıri - qala turǵyndary men qonaqtaryna, jalpy sport súıer qaýymǵa tartý etilgen erekshe syı, dástúrli sporttyq mereke», - dep atap ótti Ábil Dóńbaev.