Almatyda 4 birdeı Halyqqa qyzmet kórsetý ortalyǵy jumysyn toqtatty.

Almatyda bir kúnniń ishinde 4 birdeı halyqqa qyzmet kórsetý ortalyqtary jumysyn toqtatty. Bul qyzmet kórsetý oryndarynyń jabylýyna halyqtyń óte az kelýi sebep. Onyń ústine, kórsetiletin memlekettik qyzmetterdiń deni sandyq júıege aýysqan. Turǵyndar kóp jumystaryn mobıldi qosymsha arqyly tyndyrady. Sondyqtan Almaly aýdanyndaǵy, Bostandyq, Jetisý jáne Túrksib aýdanyndaǵy front ofıstar jabylǵan.

«Munyń bári «Sıfrlyq Qazaqstan» baǵdarlamasy aıasynda istelip jatqan sharýalar. Óıtkeni búgingi kúni elimiz boıynsha «Sıfrlyq Qazaqstanǵa» halyq qyzmet kórsetý ortalyqtarynyń mamandary oqytýlar ótkizip jatyr. Búkil mekemelerge baryp, oqytýlar ótkizip jatyr. Sonyń saldarynan bizdiń saýatty azamattardyń sany artyp otyr», - dedi Almaty qalasy Halyqqa qyzmet kórsetý ortalyǵy departamenti qoǵammen baılanys jónindegi menedjeri Jańyl Ápetova.

Jabylǵan halyqqa qyzmet kórsetý ortalyqtarynyń ár qaısysynda 15-16 adamnan jumys istegen eken. Olardyń barlyǵy qaladaǵy basqa front ofıstarǵa jumysqa ornalasypty. Mamandar osy kúni mobıldi qosymsha arqyly memlekettik qyzmet alýdy úıretip júr. Jyl basynan beri 13 myń adam oqytylǵan. Turǵyndardyń ózderi de burynǵydaı uzyn-sonar kezekte turmaı, elektrondy qyzmet arqyly jumystarymyzdy jyldam bitiremiz deıdi.