Semeıdegi estý qabileti buzylǵan balalarǵa arnalǵan mektep-ınternattyń tárbıelenýshileri áli kúnge deıin oryssha shýmaqtardy oqyp, jattaýǵa májbúr bolyp keledi. Bul týraly Egemen Qazaqstan gazeti jazdy.
Maqala avtorynyń sózinshe, bul jaǵdaıdy Memlekettik qyzmet isteri jáne sybaılas jemqorlyqqa qarsy is-qımyl agenttiginiń janynan qurylǵan respýblıkalyq arnaıy monıtorıńtik toptyń músheleri anyqtaǵan eken.
«Meniń sózime senbessizder bálkim. Biraq shyndyǵy osy, balalarymyz «Otanymyz - KSRO, eldiń basty qalasy – Máskeý» dep jazylǵan oqýlyqpen oqyp jatyr», deıdi arnaıy monıtorıńtik toptyń tóraıymy Aıgúl Solovóva.
Respýblıkalyq arnaıy monıtorıńtik toptyń múshesi Qoblanbek Qojın óziniń feısbýktegi paraqshasynda osy jáıtke qatysty ınternat tárbıelenýshileriniń ata-analardyń birinen shaǵym túskenin jazypty.
«Nasha Rodına – Sovetskıı Soıýz», «Vezde ı vo vsem ımá Lenına s namı» - Semeıdegi estý qabileti buzylǵan balalarǵa arnalǵan ınternattyń balalarynyń oqıtyny – osy.
Jańa oqýlyqtar bolmaǵandyqtan, balalar Sovet zamanyndaǵy, 1983 jyly shyqqan oqýlyqtarmen oqýǵa májbúr eken. Óıtkeni, jańa oqýlyqtar joq. Ókinishke qaraı biz ázirge múmkindigi shekteýli balalarǵa ne qazaq, ne orys tilinde zaman talabyna saı birde-bir oqýlyq shyǵara almadyq», - dep pikirin bildiripti respýblıkalyq arnaıy monıtorıńtik toptyń múshesi Raqym Oshaqbaev óziniń feısbýktegi paraqshasynda.
Al oblystyq bilim basqarmasynda Bilim mınıstrliginiń 2017 jylǵy 27 shildedegi №352 buıryǵymen mekemedegi sabaqtar jańartylǵan bilim mazmunyna sáıkes oqytylatynyn, al 1987 jyly shyqqan «Razvıtıe rechı» oqýlyǵyn pedagogtar orys tili men oqý sabaǵyna qosymsha jattyǵý retinde paıdalanylatynyn jetkizgen
«Mektepke deıingi daıarlyq tobyndaǵy sabaq jalpy bilim beretin mektepterdiń 1-10 synyptarǵa arnalǵan oqýlyqtary (2000-2016 jyldary shyqqan) negizinde júrgiziledi. 2018 jyldyń 1 qańtarynan 5-7 synyptarda orys tili, hımıa, bıologıa, algebra, geometrıa pánderi 2017 jyly shyqqan jalpy bilim beretin oqýlyqtarmen oqytylyp jatyr», - delingen oblystyq bilim basqarmasy basshysynyń mindetin atqarýshy Saırangúl Jumádilovanyń Bilim jáne ǵylym mınıstrliginiń jalpy jáne orta bilim departamentine bergen jaýabynda.
Avtordyń aıtýyna qaraǵanda, oblystyq bilim basqarmasy Bilim mınıstrligine bergen jaýabynda ıdeologıalyq turǵydan ábden eskirgen, búgingi zaman talabyna múlde sáıkes kelmeıtin oqýlyqtardyń aldaǵy ýaqytta ınternattyń oqý baǵdarlamasynan alynatyny-alynbaıtyny jaıynda sóz qozǵamapty.
"Álde «qosymsha retinde» odan ári oqytyla bere me? Degenmen de Bilim mınıstrligi atalǵan jáıtke jiti nazar aýdaryp, tıisti sheshim qabyldaıdy dep úmit etemiz" - deıdi avtor.
