Bıyl Almaty zoobaǵy jańa keıipke ense, onyń aýmaǵynda jas natýralıser mektebin ashý josparlanýda. Tabıǵatpen etene bolǵysy keletinder janýarlar, ósimdikter týraly ilimderin jetildire alady. Zoobaqta jaqynda jańa turǵyndar paıda boldy. Fransıadan lemýrlar jetkizilse, ponı men eshkiler tóldedi.
Zoobaqta qazir tóldeý maýsymy bastaldy. Shotlandıalyq ponılar jylyna bir ret qana qulyndaıdy. Prımattar bóliminde de tolyǵý bar. Shetelden ákelgen lemýrlarǵa qyzmetkerler «Aı» men «Kún» degen at beripti. Qysqa merzimniń ishinde kelýshilerdiń súıiktilerine aınalǵan olarǵa Chehıadan taǵy 4 lemýr qosylady.
«Bul lemýrdy kópten kútken bolatynbyz. Armandar oryndalady dep 23 naýryz kúni bizdiń armanymyz oryndalyp, osy lemýr larıdy aldyq. Endi Chehıadan 4 basyn kútip otyrmyz. Bári kóbeıip, úlken top bolyp, osy sharda turatyn bolady», - dedi prımattar bóliminiń meńgerýshisi Sholpan Ábdibekova.
Aqqýlar da balapandaryn basyp shyǵarǵan. Taǵy bir jup tolyǵýdy kútýde. Alaıda, aqqýlar óte qyzba kórinedi. Qanatynyń kúshtiligi sonshalyq, tipti adamnyń qolyn syndyrýǵa qaýqary bar eken. Sondyqtan mamandar olardy tamaqtandyrarda saq bolýǵa shaqyrady. Djambo atty sýsıyr men Fransıadan ákelgen qurbysy ekeýinde jáne Orman atty amýr barysynda jaqyn arada tóldeýi bek múmkin. Teńbil tústi janýar túrlendirý baǵdarlamasyna qatysyp, Vladıvostoktan ákelinetin Taıga atty teńin kútýde. Bul josparlardy oryndaý úshin jnýarlarǵa qolaıly jaǵdaı jasalyp jatyr. Jeltoqsan aıynda jańa ekspozısıalar qurylysy bastalady.
«Eki qurylymnyń qurylysyn bastaýdy josparlap otyrmyz. Ol qar barysy, aıýlar men qasqyrlarǵa arnalǵan mekender. Aıý men qasqyrǵa bir qurylym salynady. Qazir biz qorshaý degen sózdi paıdalanbaýǵa, onyń ornyna ómir súrý qalpy degendi jón kóremiz. Tabıǵatta erkin ómir súrýine jaǵdaı jasaýǵa tyrysamyz», - dedi Almaty zoobaǵy dırektorynyń mindetin atqarýshy Aıgúl Tóleeva.
Al alǵash paıda bolǵan 25 tonnalyq akvarıým baqtyń maqtanyshyna aınalǵan. Oǵan akýlalar men mýrenalar jiberilgen. Sý janýarlary sırek kózge kóringenimen, beınetaspamyzǵa túsire aldyq. Kelýshilerdi kloýn-balyqtar, hırýrg-balyqtar, teńiz kirpileri men medýzalar erekshe qyzyqtyrady.
«Biz Almaty zoobaǵyn tamashalaýǵa arnaıy Óskemennen keldik. Birinshi kezekte balalarym men nemerelerim baı tarıhy bar osy oryndy tamashalaýdy qalap edi. Bizdiń qalada joq janýarlar osynda eken. Alǵan áserimiz erekshe», - dedi Záýre Múbárakova.
Bıyl jazda zoobaq janynan zoomektep ashý josparlanýda. Tabıǵat janashylarlaryna flora men faýna týraly ilim beriledi. Jeltoqsan aıynda janýarlardyń qysqy mekenderine aǵymdaǵy jóndeý jumystary júrgiziledi. Ol úshin jergilikti qazynadan 237 mıllıon teńge qarastyrylyp otyr.
