Batys Qazaqstan oblysynyń aıtysker aqyny, Halyqaralyq aıtys aqyndary men jyr-termeshiler odaǵynyń múshesi Baýyrjan Shırmedınulynyń «Qalaǵa hat» atty jyr keshi ótti.

Shara Baýyrjan oqyǵan J. Dosmuhamedov atyndaǵy orta mektep-balabaqsha kesheninen bastaý aldy. Jahanshanyń músini ornatylǵan alańda kesh qonaqtaryna mektep oqýshylary ádebı montaj qoıyp, óleńder oqydy. Qonaqtar Alash mýzeıinde de bolyp, Alash arystarynyń ótken ómirimen, taǵdyrymen tanysty.

Keshtiń negizgi bólimi aýdandyq mádenıet úıinde Baýyrjan Shırmedınuly týraly kitap kórmesinen bastalyp, onyń avtorlyq fotosýretteri de halyq nazaryna usynyldy.

Baýyrjannyń «Dápter» atty alǵashqy óleńder jınaǵynyń tusaýkeserine halyq kóp jıyldy. Zalda bos oryn bolmaǵan soń, aıaqtyń talǵanyna qaramastan, tik turǵan kúıinde tórt saǵatqa sozylǵan keshtiń sońyna deıin óleń tyńdaǵan kórermender de boldy.

B. Shırmedınulynyń jyr keshiniń 22 mamyrǵa qoıylýynyń sebebi, bul onyń anasynyń týǵan kúnine jasaǵan syıy eken. Anasy, apasy týraly óleń oqyp, zalda otyrǵan anasy Maıraǵa gúl syılady.

Keshti aqyn adamǵa úlken oı salar, týǵan jerge, aýylǵa degen mahabbat pen saǵynyshtyń otyn mazdatatyn, aýyldyń tirligin kóz aldyńa dóńgeletip ákeletin «Qa-laǵa hat» óleńimen aıaqtady.

Syrym aýdany ákimi Tólegen Tóreǵalıev «Nebir alyp ta, Syrymdaı, Jahanshadaı batyr da, Abdolla men Qadyrdaı aqyn da anadan týyldy. Sondyqtan búgingi toı, búgingi qýanysh Baýyrjannyń anasy Maıra apamyzdyń qýanyshy. Balańyzdyń el aldyndaǵy abyroıyn kórip otyrsyz. Jasyńyz qutty bolsyn!», – dep Maıra apaıdyń basyna oramal jaýyp, qamzol kıgizip, qurmet kórsetti». Balamnyń jetistigin, ony qaýmalap kelgen osyndaı eldi kórip otyrǵan men álemdegi eń baqytty anamyn. Baýyrjan – tek meniń balam emes, eldiń balasy», – dep aqynnyń anasy tebirene alǵysyn aıtty.