Búgin Qostanaı oblysyna jumys sapary aıasynda QR Premer-Mınıstri Baqytjan Saǵyntaev Rýdnyı qalasynda Indýstrıalyq-ınnovasıalyq damý memlekettik baǵdarlamasy aıasynda iske asyrylǵan «Lıder – 2010» JSHS-de boldy, sondaı-aq óńirdiń aýyl sharýashylyǵy taýarlaryn óndirýshilerimen kezdesý ótkizdi, dep habarlaıdy Qamshy.kz aqparat agenttigi.
Sút zaýytynyń sehtaryn aralaý barysynda «Lıder – 2010» JSHS dırektory Aleksandr Lıgaı óndiristiń tehnologıalyq erekshelikteri týraly aıtyp, sút jáne qyshqyl sút ónimderin shyǵarýǵa arnalǵan jabdyqpen, osynda shyǵarylatyn ónimder suryptamasymen tanystyrdy.
Áńgimelesýdiń basty taqyryby — Memleket basshysynyń kásipkerlik qyzmetti retteýdi jetildirý máseleleri týraly zańǵa qol qoıýyna baılanysty keshe kúshine engen bızneske arnalǵan jańalyqtar men ózgerister boldy. Sondaı-aq, Prezıdenttiń «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» Joldaýy men Agroónerkásip keshenin damytýdyń memlekettik baǵdarlamasyn iske asyrý máseleleri talqylandy.
Baqytjan Saǵyntaev qujatqa qol qoıylǵannan keıin bızneske, onyń ishinde AÓK salalarynda ósimniń jańa múmkindikteri ashylatynyn málimdedi. Qabyldanǵan zań bıznesti retteý salasyndaǵy zańnamany yryqtandyrýǵa baǵyttalǵan jáne memlekettik baqylaý fýnksıalaryn shamamen 30%-ke qysqartýdy kózdeıdi. Olardyń ishinde ańshylyq jáne balyq sharýashylyǵyn júrgizý salasyndaǵy baqylaý. Osylaısha, 14 kodekske jáne 109 zańǵa engizilgen 1000-ǵa jýyq túzetýler bıznesti damytýǵa barynsha qolaıly jaǵdaı jasap, elimizde kásipkerlik qyzmetti nyǵaıtýǵa jańa mańyzdy yntalandyrý sharasy bolady.
AÓK damytý máselelerin talqylaý barysynda óńirde Memleket basshysynyń 2018 jylǵy Joldaýynda bergen tapsyrmalarynyń oryndalý qarqyny qaraldy. Agroónerkásip kesheni salasynda bes jyl ishinde keminde 2,5 esege eńbek ónimdiligin jáne óńdelgen aýyl sharýashylyǵy ónimderi eksportyn ulǵaıtý mindetteri qoıylǵan.
Memleket tarapynan tıisti jaǵdaılar jasalyp jatyr. Sońǵy bes jylda salany tikeleı memlekettik qoldaý kólemi úsh esege artyp, shamamen 260 mlrd teńgege jetti. Ótken jyly 2017–2021 jyldarǵa arnalǵan agroónerkásip keshenin damytýdyń memlekettik baǵdarlamasy qabyldandy. QR Prezıdentiniń tapsyrmasyna sáıkes shaǵyn jáne orta sharýashylyqtardy aýyl sharýashylyǵy kooperasıasyna tartý boıynsha aýqymdy jumystar júrgizilip jatyr. Balyq sharýashylyǵy, qoı sharýashylyǵy, ara sharýashylyǵy ónimderin jáne jylqylardy, sondaı-aq kebekti eksporttaýǵa Qytaı naryǵy ashyq. BAÁ-ǵa iri jáne usaq qara mal jetkizýge qoıylǵan kedergiler joıyldy.
Qabyldanǵan sharalar nátıjesinde aýyl sharýashylyǵy jalpy óniminiń kólemi 2017 jyly 2,9%-ke artyp, 4,1 trln tg qurady. Sondaı-aq, azyq-túlik ónimderiniń 4,1%-ke óskeni baıqalady. Azyq-túlik ónimderi óndirisine jáne aýyl sharýashylyǵynyń negizgi kapıtalyna salynǵan ınvestısıalardyń ósimi shamamen 30% qurady.
Premer-Mınıstr Qostanaı oblysy aýyl sharýashylyǵy taýarlaryn óndirý kólemi boıynsha jetekshi aımaq ekenin atap ótti. Óndiriletin azyq-túlik ónimderiniń úshten biri eksporttalady. Indýstrıalyq-agrarlyq erekshelikterin eskere otyryp, óńir AÓK salasyn sıfrlandyrý boıynsha pılottyq óńir retinde anyqtalǵan. Oblystyń agroónerkásip keshenin damytýdyń ótken jyldaǵy negizgi kórsetkishteri turaqty ósimdi kórsetedi.
Aýyl sharýashylyǵynyń birinshi vıse-mınıstri A. Evnıev kásipkerlik qyzmetti retteýdi jetildirý týraly qabyldanǵan zańdy eskere otyryp, fermerlerge beriletin múmkindikter týraly tolyǵyraq aıtyp berdi.
Aýyldyq jerlerde kásipkerlikti damytý, SHOB básekege qabilettiligin arttyrý, eksporttyń jańa naryqtaryna shyǵý máseleleri boıynsha «Atameken» UKP basqarma tóraǵasy A. Myrzahmetov baıandady.
Máselelerdi talqylaý barysynda jergilikti agrarshylar kásipkerlik qyzmet týraly jańa zańǵa qoldaý bildiretinderin aıtty.
«Biz Elbasynyń tarıhı sheshimin qoldaımyz. Qabyldanǵan zań bizge bıznesti keńeıtýge úlken múmkindikter beredi», — dedi oblystyń qoǵamdyq keńesiniń tóraǵasy, «Qarqyn» JSHS quryltaıshysy S. Buqanov.
Budan ózge, «Altynsarın» JSHS dırektory B. Knázev, «AF Dıevskaıa» JSHS dırektory O. Danılenko, «PKF Qaırat» JSHS dırektory T. Ótepov pikir bildirdi. Óńirdiń aýyl sharýashylyǵy ónimderin óndirýshileri sıfrlandyrý, jeńildetilgen JJM-men qamtamasyz etý, aýyl sharýashylyǵy tehnıkalaryn shyǵarý máselelerin kóterdi. Qozǵalǵan máselelerge qatysty aýyl sharýashylyǵynyń birinshi vıse-mınıstri A. Evnıev pen «Zerde» UAKH» AQ basqarma tóraǵasy R. Eńsebaev tıisti túsinikteme berip ótti.
Máselelerdi talqylaý qorytyndysy boıynsha QR Premer-Mınıstri Baqytjan Saǵyntaev agrarlyq sektordyń strategıalyq mańyzdylyǵyn eskere otyryp Memleket basshysynyń alǵa qoıǵan barlyq tapsyrmalary taıaý merzimde iske asyrylýy qajet ekenin atap ótti. Agrobıznes alǵa qoıylǵan mindetterdi oryndaý prosesine tartylyp, ıdeıalar men naqty sheshimderdi usynýy kerek.
Osyǵan baılanysty Aýyl sharýashylyǵy mınıstrligi basqa memlekettik organdarmen birlesip, kezdesý barysynda aıtylǵan suraqtar men usynystardy qarastyrýy qajet.
Premer-Mınıstrdiń orynbasary — aýyl sharýashylyǵy mınıstri Ó. Shókeevke AÓK damytý memlekettik baǵdarlamasy aıasynda ázirlenip jatqan etti jáne sútti mal sharýashylyǵyn, qus sharýashylyǵyn damytý, sýarmaly jerler jáne t.b. salalardaǵy salalyq baǵdarlamalardy egjeı-tegjeıli talqylaý maqsatynda óńirdiń agrarshylarymen kezdesý ótkizý tapsyryldy. Paıdaly keńester eskerilýi kerek.
Sondaı-aq, Premer-Mınıstr Baqytjan Saǵyntaev ASHM sıfrlandyrý baǵyty boıynsha mindetterdi oryndaýǵa basymdyq berý kerektigin atap ótti. Premer-Mınıstrdiń orynbasary A. Jumaǵalıevke AÓK salasynda bólinip jatqan barlyq sýbsıdıalardy sıfrlandyrý boıynsha bastalǵan jumysty aıaqtaý tapsyryldy. Sonymen birge, agrarlyq bıznes ókilderiniń eskertýleri men usynystaryn eskerý qajet.
