Almatydaǵy jedel járdem kólikteriniń barlyǵy jyl sońyna deıin sarǵylt túske boıalady. Qazirdiń ózinde qaladaǵy 10 sanıtarlyq avtokólik jańa talapqa saı jasaqtalyp, sarǵaıyp shyǵa keldi. Jedel járdemniń jańa dızaıny qyzmet sapasyna qanshalyqty áser etpek? Járdem brıgadasy shaqyrtýǵa rasymen tez jete me?
Bıyl elimizdegi barlyq jedel járdem kóligi lımon túske boıalyp, mynadaı jaryq shaǵylyspaıtyn qyzyl elementteri paıda bolady. Qazirdiń ózinde Almatydaǵy jaýapty mamandar 10 kólikti jańa talaptarǵa saı sarǵylt túske boıap úlgeripti, al qalǵan 167-sin jyl sońyna deıin jańa túske almastyrýdy kózdep otyr.
Damyǵan elderdegi jedel járdem qyzmetine saı, jańa dızaınmen jarqyn túske boıalǵan bul sanıtarlyq kólikti Almatydaǵy aq halattylar synap kórdi. Dárigerler Rozybakıev kóshesindegi shaqyrtýǵa jetý úshin Jedel járdem stansıasynan 2 kólikke bólinip, bir mezette shyqty. Bir brıgada aq kólikke otyrsa, qalǵany lımon tústi mashınaǵa mindi. Alaıda, sıgnalynyń daýsy qatty shyǵatyn, ári birden kózge túsetin sarǵylt túske boıalǵan jedel járdem dittegen jerine jyldam jetse, aq tústegi kólik 5 mınýtqa keshikti. Shuǵyl kómekke muqtaj jandar úshin bul kidiristiń ózi keri áserin beredi, deıdi aq halattylar.
Saraptamaǵa sáıkes, qanyq túske boıalǵan jedel járdem kóligi basqa kólikterge qaraǵanda birden kózge túsetin kórinedi. Sonyń arqasynda tas joldaǵy tizginshiler olarǵa birden jol beredi eken. Dese de, jedel járdem qyzmetkerleri arnaıy tehnıkanyń dabyly men túsine de beı-jáı qaraıtyn júrgizýshiler kóbeıip ketekenine qynjylýda.
«Kóbinese jibermeıdi, keı júrgizýshiler bar jiberedi. Kez kelgen ýaqytta kepteliste kóp turyp qalamyz. Keshigip keletin kezder bolady», - dedi jedel járdem kóliginiń júrgizýshisi Murat Esenbaev.
2 mıllıonǵa jýyq halyq turatyn Almaty qalasynda jedel járdem qyzmetine kúnine eki jarym myńǵa jýyq shaqyrtýlar túsedi. Medıkter birinshi kategorıaly shaqyrtýǵa15 mınýtta jetýi kerek. Biraq kólik keptelisi men júrgizýshilerdiń jol bermeýi kesirinen alǵashqy kómek kórsetýshiler jarty saǵatqa deıin keshigedi eken. Sondyqtan bıyl qaladaǵy halyq kóp turatyn aýmaqqa qosymsha modýldik podstansıalar qoıý kózdelip otyr.
«Biz qosymsha qazir taǵy da modýldik podstansıalardy qoıý josparlap otyrmyz. Iaǵnı, búgingi kúni bizdiń eń alys baratyn jedel járdem mashınasynyń baratyn jeri 18 km-ge deıin bolatyn bolsa uzaqtyǵy, sol qoıylatyn modýldik podstansıalardyń arqasynda 7 km-ge deıin barý uzaqtyǵy azaıyp 10-15 mınýttta jetý máselesin jetý jolyn biz qarastyryp jatyrmyz. 21 jerge qoıylaıyn dep otyr. Bıylǵa josparymyz bar», - dedi Almaty qalasy medısınalyq jedel járdem stansıasynyń bas dárigeri Sábıt Pazylov.
Búginde Almaty qalasynda shuǵyl kómek kórsetetin 177 avtokólik júrse, 700-ge jýyq aq halatty naýqastarǵa qol ushyn sozady. Dese de, maman tapshylyǵy bar, dedi basshylyq. Óıtkeni, dárigerlerdiń kóbi tájirıbe jınaǵan soń, ózge qyzmetke aýysyp ketetin kórinedi. Sondaı-aq turǵyndar tarapynan feldsherlerge qoqan-loqy kórsetý derekteri de oryn alady eken. Máselen, bıyldyń ózinde jedel járdem qyzmetiniń 3 dárigerine shabýyl jasalǵan.
