Almatylyq alty jasar Dinmuhammed Tólendınov shahmattan álem chempıony atandy. Jahandyq jarysta otandasymyz Ázirbaıjan men Mońǵolıanyń sportshylaryn utyp, bas júldege ıe boldy.
Dinmuhammed Baqytuly shahmatqa qyzyqqanyna kóp ýaqyt bolmapty. Nebári 5 jasynda ǵalamtordan atalǵan oıynnyń beınesabaǵyn qarap, úırengen. Qazir ákesin oılanbastan utatyn jaǵdaıǵa jetti. Balasynyń osy sportqa yntasy baryn sodan baıqadyq, deıdi ákesi. Keıin shahmat seksıasyna qatysa bastaǵan. Az ýaqyttyń ishinde úlken nátıje kórsetipti.
«5 jasynan bastap shahmatty ózim úırettim kishkene. Men ózim shahmatshy emespin. Yntasy boldy. Sodan keıin shahmat mektebine berdim. Sodan beri jaqsy nátıjeler kórsetip júr. 6 jasynda 1-shi dáreje aldy. Bizdiń Almatyda ondaı balalar joq-aý deımin», - dedi D. Tólendınovtiń ákesi Baqyt TÓLENDINOV.
Dımash shahmatty oınaǵanda úlken sportshylar sekildi ádister qoldanady, deıdi ustazy. Alaıda, oıyn balasy bolǵannan keıin bir orynda uzaq otyryp jalyǵady deıdi.
«Dımash bizge kelgende 3-shi razrádta bolǵan. Topqa alyna salysymen tez damı bastady. Bir aıtqan zatty tez úırenip alady. 3 aıdyń ishinde 1-shi razrádty oryndady. Sodan keıin biz Dımashpen jeke daıyndala bastadyq. Professıonaldy túrde jumys istedik. Nátıjesinde, álem chempıony atandy. Alty jasar bala shahmattan jahandyq jarysta bas júlde alý degen úlken jetistik», - dedi halyqaralyq grosmeıster Aleksandr KASHASHVILI.
Dinmuhammed Tólendınov 6 jasynda shahmattan álem chempıony atandy. 7 jasqa deıingi jasóspirimder arasynda ótken álem chempıonatynda qarsylastarynan 1,5 bal joǵary jınap, oq boıy ozyp shyqqan. Jahandyq jarysta bas júlde alǵannan keıin birden sport sheberine úmitker ataǵyn da alypty.
«6-shy, 7-shi jáne 8-shi týrda Dımashqa óte myqty qarsylastar tústi. Ásirese, Ázirbaıjan shahmatshylary qıyndyq týǵyzdy. Alaıda, bizdiń balaqaı úsheýin de jeńip, chempıon atandy», - dedi halyqaralyq grosmeıster Aleksandr KASHASHVILI.
Qazir Dımash qarasha aıynda Ispanıada jasóspirimder arasynda ótetin jarysqa daıyndalyp jatyr. Aptasyna 6 kún shahmat sabaǵyna qatysyp júr. Výnderkındtiń ákesi balasynyń Jansaıa Abdýmálik sekildi Qazaqstannyń atyn álemge tanytsa eken deıdi.
