Elordalyq «Astana Balet» teatry Almatyǵa 3 kúnge gastróldik saparmen keldi. Shyǵarmashylyq ujym Astananyń 20 jyldyq mereıtoıy aıasynda týyndylaryn tartý etedi. Teatr grýppasy elimizdiń horeografıa óneriniń zamanaýı jáne ulttyq úlgilerin kórsetpek. Ónerpazdar neoklassıka shedevri Djordj Balanchınniń «Serenadasy» men otandyq baletmeıster Mýkaram Avahrıdiń «Jýsan» spektaklin usynady. Dál qazir Abaı atyndaǵy balet jáne opera teatrynan tikeleı efırge áriptesim Jadyra Omarjan qosylýǵa daıyn tur. Qaıyrly kesh! Jadyra, qos qoıylymnyń ereksheligi qandaı?
Qaıyrly kesh, Toǵjan! Iá, osydan shamamen 30 mınýt buryn bastalǵan «Astana Balet» teatrynyń óneri kópti tánti etti. Óıtkeni, shyǵarmashylyq ujym álemdik balet jaýharlaryn kórsetpek. Joǵaryda aıtyp ótken, qos qoıylym da minsiz stıl men ǵajaıyp horeografıasymen erekshelenedi. Máselen, «Serenada» spektakli «Astana Balet» teatrynyń sahnasynda alǵash ret Djordj Balanchın qorynyń qoldaýymen qoıylyp, horeograftyń máneri men tehnıkasynyń standarttaryna saı jasaldy. Balanchın qoıylymynda qarapaıym kostúmder, jeńil dekorasıalar qoldanydalady. Eń bastysy - mýzyka men bıdiń úndestigi. «Astana Balet» teatrynyń ártisteri ózderi úshin de tyń horeografıada ásem de asqaq bıdi, plasıkalyq sýrettiń naqtylyǵyn pash etip, neoklassıka shedevrine jan bitirdi.
«Spektákldiń ereksheligi - bul jerde qyzdarda, uldarda qosylyp óner kórsetemiz jáne ár kezde, ár jyldary bolǵan jaǵdaılardyń úzindilerin kórýge bolady. Sol jaǵynan erekshe. Ári kostúm jaǵynan da kishkene zamanaýı qylyp qoıylǵan. Kishkene qazaq bı ónerimen qazirgi zamanaýı baletty qosyp alyp shyǵamyz», - dedi «Astana Balet» teatrynyń jetekshi solısi Rıza Qanatqyzy.
Zamanaýı baletmeıster Mýkaram Avahrıdiń «Jýsan» atty bir aktili baleti horeografıa tilimen órnektelgen halqymyz ben dalamyzdyń tarıhy. Tereń mazmunǵa toly, erekshe spektáklde Qýat Shildebaevtyń, Sergeı Rahmanınovtyń, Karl Djenkınstiń mýzykasy shyrqalady. Qýat Shildebaevtyń áýenderi spektákldiń negizgi qazyǵyna aınalǵan. Balet dala tynysy men týǵan úıdiń jylylyǵyna, qasiret azaby men qaıta damý qýanyshyna, ásem sulýlyq pen Otanǵa degen mahabbat sezimine toly. Al 5 mamyr kúni «Astana Balet» teatry kórermen nazaryna ekstremaldi tehnıka, tynymsyz qımyl men qarqyndy mýzyka yrǵaǵyna quralǵan Ýılám Forsaıttyń «In the Middle, Somewhat Elevated» atty spektakli usynady. Ýılám Forsaıt baleti - dekorasıasyz, askettik kostúmder, yrǵaqty mýzyka, erekshe balet tehnıkasy men adam tániniń múmkindiginiń sheginde oryndalǵan tynymsyz qımyl aǵynyn sıpattaıdy.
«Biz bıylǵy gastróldik saparymyzdy tolyqtaı Astananyń 20 jyldyǵyna arnaımyz. Sondyqtan biz eń tańdaýly degen spektaklderdi aldyq. Almatydan soń Taldyqorǵanǵa, Aqtaýǵa baramyz. Quramymyzda 60 ártis bar. Aralarynda sheteldik tájirıbeli ártisterde óner kórsetedi», - dedi «Astana Balet» teatrynyń dırektory Valerıı Kúzembaev.
Repertýarynyń alýan-túrliligi, oryndaýshylyq deńgeıi men spektáklderdiń sahnalyq bezendirilýi arqasynda «Astana Balet» teatrynyń shyǵarmashylyǵy elimizde ǵana emes, dúnıejúzinde de erekshe qoshemetke ıe. Eske sala keteıik, «Astana Balet» teatry 2012 jyly memleket basshysynyń bastamasymen quryldy. Ujym klasıkalyq dástúr men halyq jáne zamanaýı horeografıanyń tendensıalaryn biriktirip, eshkimge uqsamaıtyn tyń beıne men stıl jasaqtaıdy. Batyl eksperımentter jasap, jańa beıneler izdep, spektáklderdiń qoıylymy men stılısıkasyn san-túrli etedi; kórermenderin jańa spektáklderimen jáne konsertterimen qýanyshqa bólep keledi
