Almatyda Uly Otan soǵysynyń ardagerlerine kómek aksıasy bastaldy. Maıdangerlerdi  azyq-túlik, dári-dármek syndy qajettiliktermen qamtamasyz etýdi «Bolashaq» qaýymdastyǵy uıymdastyryp jatyr. Olar jeńis kúnine deıin qaladaǵy 60 qart jaýyngerdiń jaǵdaıyn bilip, quttyqtap shyqpaq. Qaıyrymdylyq sharasyn uıymdastyrýshylardyń aıtýynsha,  qajetti qarjyny «Bolashaq» baǵdarlamasymen shetelde oqyp kelgen túlekter jınaǵan. Olar bıyl bir mıllıon teńgeniń qaıyrymdylyǵyn jasaýdy josparlapty. 

«Ashtyqty kórdim 7-8 jasymda, 1931-1932 jyly. Odan keıin 1937-1938 jyly halyqtyń  jylaǵanyn, naqaqtan sottalyp jatqanyn kórdim. Soǵysqa basynan aıaǵyna deıin qatynastym. Ómirdiń jaqsylyǵynda, qıynshylyǵynda kórdim. Ómirge qanaǵat deımin. 95- ke keldim», - dedi Uly Otan soǵysynyń ardageri  Oljabaı Temirhanov.

Bolashaqtyqtar búgingi kúnge deıin Almatydaǵy 45 ardagerge baryp, olardyń hal-ahýalyn bilip shyqqan. Aıtýlarynsha, ardagerlerdiń arasynda densaýlyǵymen qatar, turmysy da nashar adamdar az emes. Tipten, kóptegen qart maıdangerler kómek surap jıi habarlasady, dedi qaýymdastyq ókilderi.

«Almaty qalasynda qazirgi kúni 800-deı aradager ǵana qalypty. Jyl saıyn olardyń sany azaıýda. Densaýlyǵyna qarasaq, jastarynyń bári toqsannan  asqan.  70-ke jýyq aradagerlerdiń áli esi bar, densaýlyǵy bar, sóıleı alady, jaqsy áńgime aıtady. 20-25 paıyzy tósek tartyp jatyr. Jaǵdaılaryna qaraǵanda endi muqtaj jandar óte kóp. Ásirese, orys halqynyń  arasynda bir ózderi turady. Balalary da turmaıdy qastarynda. Ardagerler bizge habarlasyp turady. Qarnymyz ashyp jatyr, tamaq joq dep. Jaǵdaıy óte nashar aradagerlerde bar», - dedi «Bolashaq» qaýymdastyǵy Almaty qalasy fılıalynyń dırektory Qymbat Ábdikerimova.