Almatyda besinshi jyl qatarynan «Máńgilik polk» sherýi uıymdastyryldy. Bıyl kósheler boıymen 100 myńnan asa almatylyq pen qala qonaqtary batyrlarynyń sýretimen júrip ótti. Bul Uly Otan soǵysyna qatysyp, jeńis jalaýyn jelbiretken jaýyngerlerge kórsetilgen qurmet. Árbir sýret ózinshe bir tarıh.

Maqtanysh, kúlki men saǵynysh kóz jasy. Máńgilik polkqa kelgen árbir azamat osy kúılerdiń birin basynan kesheri sózsiz. Qoldaryna ustaǵan sýretterdegi taǵdyrlar da ártúrli. Biraq bul bizdiń ortaq tarıhymyz. Maıdangerlerdiń qanymen, janymen kelgen Uly Jeńis kúnin beıbit elde toılap kelemiz. Post keńestik memleketter sıaqty, bizdiń elimizde de ár 9 mamyr qurmet-qoshemetpen ótkiziledi. Máńgilik polk marshy uıymdastyrylyp, Almaty kóshelerine óz batyrlarynyń sýretin, marapattaryn ustaǵandar shyǵyp, batyrlar rýhyna taǵzym etedi. Bıylǵy sharaǵa dástúr boıynsha 100 myńnan asa adam qatysady dep josparlanyp otyr.

Almatyda bul sherý besinshi jyl qatarynan ótkizilip jatyr. Byltyrǵy sharaǵa 10 myńnan asa adam qatysqan bolatyn. Aıta ketelik, «Máńgilik polk» azamattyq aksıasy 2012 jyly Reseıdiń Tomsk qalasynda bastaý alǵan bolatyn. Keıin qozǵalys Qazaqstan, Reseı, Qyrǵyzstan, Ýkraına men Izraıldde qoldaý tapty. 2013 jyly bul shara 120 qalada, al 2014 jyly jeti eldiń 500-den astam qalasynda uıymdastyryldy.

Ókinishtisi sol, jyl sanap Uly Otan soǵysyna qatysqan batyr ardagerlerimizdiń sany azaıýda. Eńbek jáne halyqty áleýmetti qorǵaý mınıstrliginiń aqparatyna júginsek, Qazaqstanda 2067 Uly Otan soǵysynyń ardageri bar. Onyń kóbi, ıaǵnı 369-y Almaty qalasynda. Búgingi Astana alańynan bastalǵan sherý  Tóle bı kóshesi boıymen Dostyq dańǵylyna deıin, ary qaraı Áıteke bı kóshesimen júrip, sherý 28-shi panfılovshylar saıabaǵynda aıaqtalady. Sherý 40 mınýtqa sozylady. Batyrlarymyzdyń erligi umytylmaıdy.