Ótkendi eske almasań, bolashaq bulyńǵyr. Qan maıdanda keýdesin oqqa tosyp, urpaqtyń beıbit kúnin qalyptastyryp ketken ardagerlerdiń sany jyl sanap azaıyp barady. Maıdan dalasynda erlik kórsetken batyrlarmen kezdesýler mektepte, joǵary oqý oryndarynda jıi uıymdastyrylyp turady.

Adamzat balasy basynan ótkergen surapyl soǵys talaı júrekterge jazylmas jara saldy. Fashısermen betpe-bet kelgende Mıhaıl Savelev 17 jasta ǵana bolǵan. Sum soǵystyń qasiretin ardager bir sát esten shyǵarǵan emes. Ol surapyl soǵysta án aıtyp, jigitterdi rýhtandyrǵanyn eske alady.

«Áskerge deıin án aıtatynmyn. Balalaıkada oınaǵandy jaqsy kóremin. Uly Otan soǵysynysń aldynda men Japonıamen soǵysqa attanǵanmyn. Sol ýaqytta ol shaıqastan buryn ekinshi dúnıejúzilik soǵysyna jiberdi. Jeńiske jetken soń, Japon soǵysyna qatystym», - dedi Uly Otan soǵysynyń ardageri Mıhaıl SAVELEV.

Ánge degen qushtarlyǵy keıin de basylǵan emes. Ol qazir ardagerlerden quralǵan horda án salady. Toqsandy alqymdaǵan Mıhaıl ataıdyń aıtýynsha, 9 mamyrdy asyǵa kútedi. Soǵystyń zulmat zamanyn bastan ótkergen ol úshin jeńis merekesinen artyq meıram joq. Almatydaǵy №27 gımnazıa oqýshylary jaýyngerlerge arnap shaǵyn konsert uıymdastyrdy. Bilim oshaǵynda ardager maıdan dalasynda basynan ótkergen qıynshylyqtary men jeńiske qalaı jetkenin jastarǵa baıandap berdi.

Bilim ordasy Jeńis merekesine oraı arnaıy kórme ashqan. Oqýshylar soǵysqa qatysqan óz atalary men apalarynyń sýretterin ilgen. Odan bólek, balalardyń qolynan shyqqan týyndylary da qoıylǵan.

«Merekemizde Uly Otan soǵysynyń ardagerleri qatysýda. Sol kisilerdiń de sýretteri bar. Jylda ótkizetin bizdiń jumysymyz. Sebebi ustazdyń eń birinshi maqsaty - ol Otan súıetin jaqsy azamat tárbıeleý», - dedi Almaty qalasy №27 gımnazıanyń dırektory Aına ÁBDIEVA.

Beıbit ómir syılaǵan ekinshi dúnıejúzilik soǵys ardagerlerimen mundaı kezdesýler mektepte jıi uıymdastyrylyp turady, deıdi mektep basshylyǵy. Aldaǵy ýaqytta 53 synyp oqýshysymen kezdesýler ótpek.