2017 jyly TMD elderiniń kedenshileri 3500 qylmystyq is qozǵap, 8 tonna esirtki zattaryn tárkilegen. Bul týraly Keden qyzmeti basshylary keńesiniń quqyq qorǵaý bólimsheleri komıtetiniń 17-shi otyrysynda aıtyldy.
Almaty mańyndaǵy «Segiz kól» kýrorttyq parkinde ótken jıynǵa Qazaqstan, Ázerbaıjan, Armenıa, Belarýs, Qyrǵyzstan, Reseı, Tájikstan jáne Ózbekstan elderiniń kedenshileri qatysty.
QR Qarjy mınıstrligi Memlekettik kirister komıtetiniń tóraǵasy Ardaq Teńgebaev: «Quqyq qorǵaý qyzmetindegi keden organdary jumysynyń mańyzy joǵary. Endi ony odan ári damytý qajet, birigip halyqaralyq yntymaqtastyq salasyndaǵy kedendik quqyq buzýshylyqtarǵa qarsy kúresý kerek», — dedi.
Reseıdiń Federaldy keden qyzmeti tóraǵasynyń orynbasary Anatolıı Seryshev otyrysta 12 másele qaralǵanyn jáne TMD kedendik qyzmet salasyndaǵy quqyq buzýshylyqtarǵa qarsy kúrestiń 2020 jylǵa deıingi Strategıasy bekitilgenin aıtty.
— Kedendik quqyq buzýshylyqtarǵa qarsy kúreste TMD memleketteriniń yntymaqtastyǵy úlken ról atqaryp keledi. Jarty jyl saıyn jasalatyn jumys nátıjesi – osyǵan dálel. 2017 jyldyń ózinde TMD aýmaǵynda 3 500 qylmystyq is qozǵaldy. Qylmystyń basym kópshiligi esirtki tasymalyna tikeleı baılanysty. TMD quqyq qorǵaý bólimsheleri kedendik qyzmetinde zańsyz aınalymnan shamamen 8 tonna esirtki quraldarynyń, psıhotroptyq zattardyń jáne olardyń prekýrsorlary alyndy. Ázerbaıjan shekarasynan jeńil kólikten 90 kılogramm geroın tabyldy. Belarýstaǵy áriptesterimizben Polsha terıtorıasynan 307 kılogramm gashısh tárkiledik. Sonymen qatar Ispanıadan Reseı Federasıasyna 250 kılogramm gashısh alyp ótpek bolǵan qylmyskerler quryqtaldy. Qylmyskerlerdiń barlyǵy transshekaraǵa jaqsy beıimdelgen. TMD aýmaǵyndaǵy barlyq eldiń zańdaryn jiti qadaǵalap otyrady. Olar kez kelgen zań buzatyn árekette ákki qımyldarǵa barady. Ózderine qolaıly sqemamen jumys isteıdi. Shekaradaǵy qylmystardy azaıtý úshin kedendegi qujat rásimdeýdi elektrondy formaǵa aýystyrý qajet. Bul jemqorlyq faktileriniń oryn alýyna da oń áser etedi, - dedi A. Seryshev.
Memlekettik kirister komıteti tóraǵasynyń orynbasary Tileý Jańǵarashev usynǵan málimetke súıensek, 2017 jyly Qazaqstandaǵy shekaralarda kedendik salyqty tóleýden jaltarý men ekonomıkalyq kontrabanda boıynsha 233 qylmystyq is tirkelip, 137 is sotqa jiberildi. Kontrabandalyq júkten 12 mıllıon AQSH dollary tárkilengen. Zańsyz esirtki aınalymy boıynsha 161 qylmystyq is qozǵalyp, 134 is sotqa jiberilgen. Al tárkilengen esirtkiniń kólemi – 25 keli.
BAQ ókilderi keden jumysyn kórý maqsatynda Almaty halyqaralyq áýejaıyndaǵy «Jetisý» kedendik beketine bardy. Beket basshysynyń mindetin ýaqytsha atqarýshy Aleksandr Mamedovtyń aıtýynsha, jyl basynan beri kedendik baqylaý júrgizý barysynda EAES kedendik shekarasy arqyly aqshany zańsyz tárkileý boıynsha 21 fakti tirkelgen.
Memlekettik kirister departamentiniń baspasóz hatshysy Gúlnár Turymtaıqyzynyń sózinshe, 18 mamyr kúni osy áýejaıda «Dýbaı – Almaty» áýereısindegi jolaýshylardyń júkterine kedendik baqylaý júrgizý barysynda MKD qyzmetkerleri kedendik rásimdeýden ótpegen 73 245 eýro men 1500 dollar alyp ótpek bolǵan Kanada azamatyn ustaǵan. Atalǵan is boıynsha qylmystyq is qozǵalǵan.
Zań boıynsha jolaýshy ózimen alyp ótetin aqsha kólemi 10 myń dollardan assa, mindetti túrde kedendik deklarasıasynda onyń qaıda jumsalatynyna deıin qysqasha maǵlumat berýi tıis. Deklarasıalanbaǵan aqsha kólemi 10 myń dollardan assa, bul ákimshilik quqyq buzýshylyqqa, al 5000 aılyq kórsetkishten asyp ketse, qylmystyq iske jatady. Aıta keterlik jaıt, EvrazES elderi arasyndaǵy aqsha quraly men jolaýshy chekteri kedendik rásimdeýsiz jasyl dálizden ótedi.
Bekette esirtki zattaryn tárkileý barysynda kınologtardyń atqaratyn qyzmeti zor. Arnaıy úıretilgen qyzmettik ıtter esirtkiniń ǵana emes, jalǵan volútanyń ıisin birden sezedi.
Mamandardyń aıtýynsha, kóbinese Úndistannan keletin jolaýshylar elimizde tirkelmegen zańsyz dári-dármek túrlerin, BAÁ-den kelgen jolaýshylar mólsherden kóp zergerlik buıymdardy termostyń ishine salyp ótpekshi bolady eken. Jiti baqylaýdyń arqasynda áreketter dereý áshkerelenedi.
